Auka samstarfið við Grænland á sjö sviðum

„Á undanförnum árum hefur samstarf Íslands og Grænlands aukist, báðum löndunum til hagsbóta. Löndin hafa margvíslega sameiginlega hagsmuni og tækifæri auk þess að glíma við sambærilegar áskoranir í loftslags- og umhverfismálum,“ segir á vef stjórnarráðsins.

Í yfirlýsingunni eru tilgreind sjö málefnasvið sem sérstök áhersla verður lögð á; viðskipti, fiskveiðar, efnahagssamstarf, loftslagsbreytingar og líffræðilegur fjölbreytileiki, jafnréttismál, menntun og rannsóknir, og menningarsamstarf.

Fram kemur í yfirlýsingunni að forsætisráðherra Íslands og formaður landsstjórnar Grænlands muni funda annað hvert ár, til skiptis í Reykjavík og Nuuk, til þess að fara yfir framgang þeirra verkefna sem tengjast samstarfsyfirlýsingunni.

„Þetta er stór dagur í samskiptum Íslands og Grænlands þegar við undirritum þessa yfirlýsingu og setjum niður ákveðin áherslusvið sem við ætlum að vinna að. Ég held að í þessu felist mikil tækifæri, bæði fyrir Ísland og Grænland,“ segir Katrín Jakobsdóttir forsætisráðherra.