Kynning á keppendum: Standa saman en ætla sér þó öll sigur

Næstu helgi keppa fimmtán ofurhlauparar fyrir Íslands hönd í bakgarðshlaupi í Elliðaárdal. Ræst verður á sama tíma í þrjátíu og sjö löndum og hlaupið hring eftir hring þar til aðeins einn hlaupari stendur eftir. Hlaupið verður í beinni útsendingu hér á Vísi.

Sjá nánar: Keppa um heims­meistara­titil í beinni út­sendingu úr Elliða­ár­dal

Í gær og í fyrradag voru tíu keppendur sem hlaupa fyrir Íslands hönd kynntir. Hér að neðan kynnumst við síðustu fimm keppendunum en þetta eru þau sem hafa hlaupið lengst í bakgarðshlaupum síðustu missera.

Keppandi 5

Rúnar Sigurðsson er 58 ára tölvunarfræðingur hjá Advania úr Hafnarfirði. Hann hefur stundað hlaup í 25 ár og nýtur þess meira með hverju ári sem líður, ekki síst vegna góðra hlaupafélaga. Það sem heillar hann við bakgarðshlaupin er að þau eru undarleg blanda af hörku og vellíðan. Hann hefur áður farið 24 hringi í bakgarðshlaupi, rúma 160 kílómetra, og stefnir á að hlaupa lengra um helgina.

Keppandi 4

Friðrik Benediktsson er 39 ára stjórnandi þungavinnuvéla og þriggja barna faðir úr Vestmannaeyjum. Hann byrjaði að stunda hlaup 2018 og lítur svo á að þar hafi hann fundið púsl sem vantaði í lífið. Hann hrífst af þeim eiginleika bakgarðshlaupa að í þeim þarftu ekki að hlaupa hraðast allra heldur að skila þér í rásmarkið áður en næsti hringur hefst. Huglægi þátturinn skiptir sköpum og ef þú stendur þig vel í honum getur fátt stöðvað þig. Friðrik reynir í öllu að vera fyrirmynd barna sinna og kenna þeim að ef maður er duglegur nær maður árangri. Í hlaupinu um helgina stefnir hann á að skila sér alltaf í rásmarkið og að safna fjölda hringa fyrir íslenska liðið. Mantra Friðriks fyrir hlaupið er „Þetta er ekki búið fyrr en ég hef sigrað.“

Keppandi 3

Flóki Halldórsson er 48 ára þriggja barna faðir í Reykjavík sem starfar hjá Seðlabankanum. Hann byrjaði að stunda hlaup 2009 og hefur lokið fjölda ofurhlaupa síðustu ár. Flóki segir frábært að stunda hlaup, meðal annars til að ná stjórn á hugsunum sínum, vera í góðu formi og lifa heilbrigðum lífstíl. Fólk í hlaupasamfélaginu á Íslandi sé líka framúrskarandi. Hann segir marga kannski halda að bakgarðshlaupin séu auðveld en þau reyni virkilega á sál og líkama. Góð áætlun sé nauðsynleg áður en hlaupið sé af stað. Mantra Flóka fyrir hlaupið um helgina er „Ég tek einn í viðbót.“

Keppandi 2

Þorleifur Þorleifsson er 43 ára sérfræðingur hjá Marel og þriggja barna faðir úr Reykjavík. Hlaupaferill hans byrjaði 2009 þegar hann skráði sig í Laugavegshlaupið og hefur hann tekið þátt í því á hverju ári síðan. 2020 sigraði Þorleifur fyrsta bakgarðshlaupið sem haldið var á Íslandi. Hann segir bakgarðshlaupin vera hrífandi því auk einfaldleika hlaupsins sjálfs sé taktík einnig mikilvæg. Hann hefur lengst farið 42 hringi, alls tæpa 282 kílómetra. Markmið hans fyrir helgina er að Ísland sé meðal 15 efstu landa. Hann stefnir einnig á að hlaupa síðasta hringinn einn.

Keppandi 1

Mari Järsk er 34 ára ræstitæknir frá Eistlandi sem hefur verið búsett á Íslandi frá 2005. Hún er orkumikil og veit ekkert betra en að hvetja aðra til dáða. Hún kolféll fyrir ofurhlaupum þegar hún tók þátt í Mt. Esja Ultra fjallahlaupinu árið 2019 og hefur verið óstöðvandi síðan. Mari hefur tvisvar sigrað bakgarðshlaup, í fyrra og nú í vor. Þá setti hún Íslandsmet, 43 hringir eða 288 kílómetrar. Markmið Mari fyrir helgina er að hlaupa enn lengra og að hjálpa liðinu öllu að ná sem lengst.

Falleg braut í Elliðaárdal

Keppnisstaðurinn á Íslandi verður í Elliðaárdal og fer hlaupabrautin um góða stíga dalsins. Eins og sést á myndbandinu í spilaranum hér að neðan er brautin falleg.