Oddur hetjan í naumum sigri - Löwen vann stórsigur í Íslendingaslag

Í þýsku úrvalsdeildinni var Íslendingaslagur þegar Ýmir Örn Gíslason og félagar í Rhein Neckar Löwen fengu Arnar Frey Arnarsson og félaga í Melsungen í heimsókn.

Skemmst er frá því að segja að Löwen vann stórsigur, 36-25 en lítið fór fyrir íslensku strákunum í markaskorun þar sem Arnar Freyr gerði eitt mark fyrir Melsungen en Ýmir ekkert fyrir Löwen; sá síðarnefndi þó kraftmikill í varnarleik heimamanna.

Í þýsku B-deildinni stal Oddur Gretarsson senunni þegar Íslendingalið Balingen vann sigur á Ludwigshafen með minnsta mögulega mun, 33-34.

Oddur var markahæsti leikmaður vallarins með níu mörk úr tíu skotum og að því er fram kemur í umfjöllun handbolti.is var Oddur allt í öllu á lokasekúndum leiksins og tryggði Balingen sætan sigur.

Daníel Þór Ingason gerði tvö mörk fyrir Balingen.