Tuttugu dagar í EM: „Dagný er seinust í 95 prósent tilvika“

Valur Páll Eiríksson skrifar 20. júní 2022 14:01

Ingibjörg Sigurðardóttir á ferðinni í leik gegn Hollendingum. Getty

Vísir telur niður í Evrópumót kvenna í fótbolta sem fram fer í Englandi í júlí og kynnir leikmenn íslenska landsliðsins. Grindvíkingurinn Ingibjörg Sigurðardóttir er önnur í röðinni.

Ingibjörg leikur með Vålerenga í Noregi og var valinn leikmaður ársins þar í landi er liðið vann norska meistaratitilinn árið 2020. Hún hóf feril sinn með Grindavík árið 2011 en gekk í raðir Breiðabliks árið eftir hvar hún spilaði til 2017.

Eftir tvær leiktíðir með Djurgården í Svíþjóð lá leiðin til Noregs fyrir tímabilið 2020 hvar Ingibjörg hefur verið síðan. Hún varð þar bikarmeistari með Vålerenga 2020 og 2021 til auka við norska meistaratitilinn árið 2020.

Ingibjörg spilaði sinn fyrsta landsleik árið 2017, þá 19 ára gömul og hefur síðan spilað alls 44 landsleiki.

Ingibjörg varð norskur meistari árið 2020.

Fyrsti meistaraflokksleikur? 2011, þá 13 ára, á móti Þrótti.

Hver hefur kennt þér mest í fótbolta? Alltof erfitt að velja einn, margir sem koma til greina! Lærði mjög mikið af Jack Majgaard Jensen sem þjálfaði mig í tvö ár hjá Vålerenga.

Lag sem kemur þér í gírinn fyrir leik? Er mikil Emmsjé Gauta fan fyrir leiki, annars er norska músíkin að koma sterk inn.

Mætir einhver af fjölskyldu/vinum til að styðja þig á EM? Já mjög margir! Ætli það séu ekki um 25 manns úr fjölskyldu minni að koma.

Hvaða námi eða vinnu hefur þú sinnt (fyrir utan fótbolta)? Er með BA í sálfræði og svo er ég einkaþjálfari.

Í hvernig skóm spilarðu? Er að prófa Puma núna og líst mjög vel á, annars er ég Nike manneskja.

Uppáhalds lið í enska? Manchester United.

Uppáhalds tölvuleikur? Spila mjög lítið tölvuleiki en Mario Cart er classic.

Uppáhalds matur? Plokkfiskur, pizza og humar.

Fyndnust í landsliðinu? Cessa fær þann titil.

Gáfuðust í landsliðinu? Elín Metta.

Óstundvísust í landsliðinu? Dagný er seinust í 95 prósent tilvika.

Hvaða lið vinnur EM (ef ekki Ísland)? Tippa á Spán.

Hvað er skemmtilegast að gera milli æfinga og leikja í landsliðsferðum? Fara í göngutúr og taka kaffi með stelpunum.