John Grant fær ríkisborgararétt

Alls bárust allsherjar- og menntamálanefnd 71 umsókn um ríkisborgararétt á vorþingi. Alþingi veitir ríkisborgararétt með lögum að fengnum umsögnum Útlendingastofnunar og lögreglustjóra á dvalarstað umsækjanda.

Þau gögn bárust einungis vegna hluta umsóknanna og leggur nefndin til að tólf einstaklingar af þeim sem sóttu um verði veittur ríkisborgararéttur að þessu sinni.

Meðal þeirra sem hljóta ríkisborgararétt eru söngvarinn John William Grant og flóttamaðurinn Uhunoma Osayomore. John Grant hefur lengi starfað hérlendis og unnið mikið með íslenskum listamönnum.

Uhunoma kemur frá Nígeríu en flúði þaðan árið 2016, þá sautján ára gamall, vegna ofbeldis og ofsókna af hálfu föður síns. Ári áður hafði hann orðið vitni af því þegar faðir hans myrti móður hans.

Kærunefnd Útlendingamála synjaði umsókn hans um alþjóðlega vernd og dvalarleyfi í febrúar í fyrra en Magnús Davíð Norðdahl, borgarfulltrúi Pírata og þáverandi lögmaður Ohunoma, beitti sér mikið fyrir málum hans á sínum tíma.

Hér má sjá listann yfir þá tólf sem hlotið hafa ríkisborgararétt:

1. Alan Ernest Deverell, f. 1955 í Bretlandi
2. Ekaterina Marnitcyna, f. 1977 í Kasakstan.
3. Houda Echcharki, f. 1993 í Marokkó.
4. John William Grant, f. 1968 í Bandaríkjunum.
5. Juliet Onovweruo, f. 1982 í Nígeríu.
6. Kelly Yohanna Avila Garcia, f. 1986 í Venesúela.
7. Marcin Jan Makuch, f. 1983 í Póllandi.
8. Nathaniel Berg, f. 1965 á Íslandi.
9. Polina Oddr, f. 2000 í Úkraínu.
10. Shirlee Jean Larson, f. 1955 í Bandaríkjunum.
11. Tímea Nagy, f. 1989 í Tékkóslóvakíu.
12. Uhunoma Osayomore, f. 1999 í Nígeríu.