Við­skipta­ráð­herra segist hafa gagn­rýnt á­form í nefnd með for­sætis- og fjár­mála­ráð­herrum

Fréttaastofa óskaði eftir viðtali við Lilju Alfreðsdóttur viðskiptaráðherra og varaformann Framsóknarflokksins í morgun vegna hins svokallaða Íslandsbankamáls en hún vísaði til greinar í Morgunblaðinu sem birtist í dag.

Þar kveðst hún hafa verið mótfallin þeirri ákvörðun að selja hlut ríkisins í Íslandsbanka til valins hóps fjárfesta. Hún segist hafa komið þessum sjónarmiðum sínum skýrt á framfæri í aðdraganda útboðsins. Lilja segir einnig í samtali við blaðið að ábyrgðinni sé ekki hægt að skella alfarið á stjórnendur Bankasýslunnar; ábyrgðin hljóti að liggja hjá þeim stjórnmálamönnum sem tóku ákvörðun í málinu. 

Segist hafa gagnrýnt áform um sölu í nefnd með forsætis-og fjármálaráðherrum

Fréttstofa óskaði eftir upplýsingum um hvar Lilja Alfreðsdóttir hafi komið þessum sjónarmiðum á framfæri og fékk þau svör að hún hafi komið þeim á framfæri í ráðherranefnd um efnahagsmál þar sem hún situr ásamt forsætis-og fjármálaráðherra.

Ágúst Bjarni Garðarson annar varaformaður efnahags-og viðskiptanefndar Alþingis og þingmaður Framsóknarflokksins segir að forsvarsmenn Bankasýslunnar hafi kynnt allt önnur sjónarmið um sölu bankans en svo hafi komið á daginn.

„Kynningin fyrir nefndinni var með þeim hætti að þarna stæði til að finna tiltölulega fáa og öfluga fjárfesta sem gætu staðið með bankanum en svo hefur bara annað komið á daginn. Ég held að Bankasýslan þurfi að íhuga stöðu sína eftir að gögn koma upp á yfirborðið. 

Fleiri stjórnarþingmenn telja að stjórn og framkvæmdastjóri Bankasýslunnar eigi að víkja vegna gagnrýni sem fram hefur komið á síðustu sölu á hlut Íslandsbanka. Þannig hefur þingmaðu Vinstri grænna Bjarni Jónsson viðrað sömu skoðun. 

Í lýsingu bankasýslunnar á tilboðsfyrirkomulaginu sem var valin við söluna til fjármálaráðherra kemur fram að þátttaka lífeyrissjóða og verðbréfasjóða í slíku útboði myndi alltaf tryggja aðkomu almennings meðóbeinum hætti. Lífeyrissjóðir sem tóku þátt í útboðinu fengu þó aðeins úthlutað um 40% af því sem þeir buðu. 

Þórey S. Þórðardóttir framkvæmdastjóri Landssambands lífeyrissjóða segir mikilvægt að salan sé hafin yfir alla gagnrýni.

„Eins og hefur náttúrulega komið fram þá  skiptir máli að byggja upp traust og því er mikilvægt að fara ofan í hvort þarna hafi ekki verið staðið eðlilega að verki, eins og ákveðið hefur verið að Ríkisendurskoðun geri nú,“ segir Þórey. 

Bankasýslan svarar gagnrýni

Bankasýslan sendi frá sér yfirlýsingu í dag þar sem stofnunin gerir athugasemdir við eitt og annað sem hefur komið fram í fjölmiðlum undanfarna daga. Þar kemur fram að varðandi gagnrýni um hverjir hafi mátt kaupa í útboðinu þá leggi  Bankasýsla ríkisins  ekki mat á hvort fjárfestar uppfylli skilyrði þess að teljast fagfjárfestar. Slíkt mat liggi lögum samkvæmt hjá fjármálafyrirtækjum. Þá hafi komið fram að einungis hafi átt að selja til stærri aðila í útboðinu. Bankasýslan svarar því í yfirlýsingunni að slík lýsing á sölu með tilboðsfyrirkomulagi hafi hvergi komið fram í tillögu Bankasýslu ríkisins, greinargerð ráðherra, kynningum stofnunarinnar fyrir þingnefndum eða áliti þingnefndanna sjálfra. Þá hefði slíkt útboð að mati Bankasýslunnar síður samrýmst meginreglum laga um dreift og fjölbreytt eignarhald, jafnræði bjóðenda og að leita skyldi markaðsverð. Hægt er að nálgast athugasemdir stofnunarinnar hér.