Björgvin Karl á topp þrjú og Katrín Tanja ofar en Sara

CrossFit-vefurinn Morning Chalk Up hefur nú sett saman slíkan styrkleikalista yfir besta CrossFit fólk heimsins í dag.

Ísland á einn fulltrúa á topp þrjú og tvo til viðbótar inn á topp tuttugu.

Bjögvin Karl Guðmundsson er langefstur af Íslendingunum en hann er í þriðja sæti listans á eftir heimsmeistaranum Justin Medeiros og Patrick Vellner.

Björgvin Karl er á undan þeim Brent Fikowski og Saxon Panchik.

Katrín Tanja Davíðsdóttir náði kannski bara fjórða sætinu meðal íslenski keppendanna í átta manna úrslitunum en hún er efst íslensku stelpnanna á styrkleikalista Morning Chalk Up.

Katrín Tanja er í tólfta sæti og einu sæti ofar en Sara Sigmundsdóttir. Sara, Þuríður Erla Helgadóttir og Sólveig Sigurðardóttir voru allar ofar en Katrín Tanja í átta manna úrslitunum.

Sara er að koma til baka eftir krossbandsslit og náði sjöunda besta árangri í heiminum í átta manna úrslitunum.

Þar sem Anníe Mist Þórisdóttir er hætt í einstaklingskeppninni og farin að keppa með liði sínu þá er hún ekki gjaldgeng á listann.

Heimsmeistarinn Tia-Clair Toomey frá Ástralíu er efst á styrkleikalista kvenna en í næstu sætum eru síðan Laura Horváth frá Ungverjalandi, Gabriela Migala frá Póllandi og Kara Saunders frá Ástralíu.

Malloory O´Brien, sem vann The Open, er síðan í fimmta stætinu á undan Haley Adams.

Upplýsingar um listann má finna í færslu Morning Chalk Up hér fyrir neðan.