Mikið um ölvunartengd mál í miðbænum og víðar

Að því er kemur fram í dagbók lögreglu var mikið um ölvunartengd mál og önnur minniháttar mál í miðbænum og er listi þeirra sem sendur er á fjölmiðla nú í morgunsárið ekki tæmandi.

Tilkynnt var um tvær líkamsárásir á skemmtistöðum í miðbænum í nótt. Fyrri árásin var tilkynnt skömmu fyrir klukkan eitt í nótt en árásarmaðurinn hafði hlaupið af vettvangi áður en lögregla kom á vettvang. 

Vitni sáu árásarmanninn og er málið nú í rannsókn. Seinni árásin var tilkynnt skömmu fyrir klukkan fjögur í nótt en lögregla var ekki með frekari upplýsingar í tilkynningu sinni. 

Tvívegis var tilkynnt um grunsamlegar mannaferðir í Austurbænum í nótt. Í öðru tilfellinu hafði tilkynnandi farið út til að athuga með grunsamlegan mann sem hann sá sniglast við húsið en sá tók þá til fótanna og komst undan. Í hinu tilfellinu var maður á hvítum sendiferðabíl að reyna að opna bíla í hverfinu en lögregla kannar nú málið. 

Þá var einnig töluvert um ölvaða einstaklinga, þar á meðal ofurölvi ungmenni sem var tilkynnt um við skemmtistað í miðbænum. Forráðamenn komu og sóttu ungennin á lögreglustöð og verður málið sett í viðeigandi ferli að sögn lögreglu. 

Nokkrir ökumenn voru þá grunaðir um ölvunarakstur og í einu tilfelli voru lögreglumenn á staðnum þegar einn slíkur ökumaður keyrði á annan bíl. Maðurinn var handtekinn og vistaður í fangaklefa í þágu rannsóknar málsins. 

Hótaði og veittist að gestum á veitingastað

Hjá lögreglustöð 2 í Hafnarfirði, Garðabæ og Álftanesi var sömuleiðis nóg um að vera. Á tólfta tímanum í gær var tilkynnt um mann sem hafði í hótunum við fólk á veitingastað í hverfinu en þegar lögreglu bar að garði reyndist maðurinn ofurölvi og var hann þá einnig búinn að veitast að gestum á veitingastaðnum. 

Ekki reyndist mögulegt að ræða við manninn á staðnum sökum ástands hans og var hann því handtekinn og vistaður í fangageymslu þar til hægt er að leysa málið og taka skýrslu af honum .

Þá var tilkynnt um ólæti á krá í hverfinu skömmu eftir klukkan eitt í nótt þar sem tveir menn höfðu reynt að stofna til slagsmála. Þegar lögregla mætti á vettvang hafði enginn slasast og ekkert skemmst og því verður málið ekki rannsakað frekar.

Á fimmta tímanum í nótt átti síðan að stöðva ökumann við umferðareftirlit en sá hljóp úr bíl sínum áður en lögregla kom að honum. Lögregla segist gruna að ökumaðurinn hafi verið með óhreint mjöl í pokahorninu og því látið sig hverfa. 

Farþegi grunaður um þjófnað og ökumaður um fíkniefnaakstur

Hjá lögreglustöð 3 í Kópavogi og Breiðholti voru nokkur verkefni. Á áttunda tímanum í gærkvöldi var tilkynnt um aðila að stela í verslun hverfinu sem fór af vettvangi í bíl. 

Þegar lögregla stöðvaði umræddan einstakling reyndist hann vera farþegi í bílnum en ökumaðurinn er grunaður um akstur undir áhrifum fíkniefna og akstur án réttinda. Skýrsla tekin á vettvangi vegna þjófnaðarins og ökumaður fluttur á lögreglustöð í sýnatöku. 

Á fimmta tímanum í nótt var síðan tilkynnt um tvo menn á gangi á stofnbraut í hverfinu. Lögregla segir að tilkynnandi hafi sagt að hasslykt væri af mönnunum en þeir voru farnir þegar lögregla kom á vettvang. Þá var einnig eitthvað um hávaðatilkynningar og önnur minniháttar mál. 

Svo virðist sem minna hafi verið að gera hjá lögreglustöð 4 í Grafarvogi, Mosfellsbæ og Árbæ en þar var ökumaður stöðvaður vegna gruns um akstur undir áhrifum fíkniefna og síðar um kvöldið var tilkynnt um umferðaróhapp þar sem bíl var ekið á ljósastór en engnn reyndist vera í bílnum þegar tilkynningin barst.