Real Madrid jók forskot sitt á toppi spænsku úrvalsdeildarinnar í fótbolta er liðið vann 4-1 sigur gegn Real Sociedad í kvöld.
Það voru gestirnir í Real Sociedad sem tóku forystuna strax á tíundu mínútu þegar Mikel Oyarzabal setti boltann í netið af vítapunktinum.
Eduardo Camavinga jafnaði metin fyrir Madrídinga fimm mínútum fyrir hálfleik og Luka Modric sá til þess að heimamenn fóru með forystuna inn í hléið þegar hann skoraði þremur mínútum síðar.
Karim Benzema skoraði þriðja mark heimamanna af vítapunktinum þegar stundarfjórðungur var til leiksloka áður en Marco Asensio gulltryggði sigurinn á 79. mínútu eftir að hafa komið inn á sem varamaður tveimur mínútum áður.
Niðurstaðan varð því 4-1 sigur Real Madrid, en liði er nú með fimm stiga gorskot á toppi spænsku deildarinnar. Liðið hefur fengið 60 stig í 27 leikjum, 13 stigum meira en Real Sociedad sem situr í þriðja sæti.
