Enginn mætti til að afhenda stelpunum í Þrótti verðlaunin

Fyrir leikinn í kvöld lá fyrir að með sigri gæti Þróttur tryggt sér sigur í mótinu. Þann fyrsta í sögu félagsins. Gengi þeirra rauðu og hvítu hefur verið upp og ofan undanfarin ár. Karlaliðið féll niður í 2. deild sumarið 2021 en mikil uppbygging hefur verið í kvennastarfi félagsins þar sem uppaldar stelpur eru mættar á stóra sviðið í meistaraflokk.

Augnablikið eyðilagt

„Það er búið að leggja ógeðslega mikla vinnu í kvennastarfið og uppbygginguna hjá Þrótti. Eftir leik stóðu bara allir og horfðu hver á annan. Hvað? Engin verðlaunaafhending? Enginn bikar?“ segir Egill Atlason, sjúkraþjálfari liðsins.

Hann segir að þarna hafi það sem hefði átt að verða stórkostleg og söguleg stund orðið að engu. Augnablikið hafi verið eyðilagt.

„Þetta var bara eins og eftir einhvern æfingaleik. Liðið stillti sér upp og það voru einhverjir Þróttarar sem tóku einhverjar myndir,“ segir Egill. Honum hafi ekki verið skemmt en augnablikið hafi í raun verið kómískt.

„Engir verðlaunapeningar, enginn bikar. Enginn einu sinni til að segja til hamingju!“

Bikarinn á sínum stað hjá Valsmönnum

Knattspyrnuráð Reykjavíkur (KRR) stendur fyrir Reykjavíkurmótinu í knattspyrnu og hefur gert í yfir hundrað ár. Valur tryggði sér sigur í karlaflokki á sunnudaginn með sigri á KR í úrslitaleik í karlaflokki. Þar voru fulltrúar KRR mættir eftir leik til að afhenda bikara, já tvo því annar er til eignar og hinn farandbikar. Leikmenn fengu venju samkvæmt verðlaunapening um hálsinn.

Töluvert hátíðlegri stemmning en í Egilshöll í kvöld.

Annað fyrirkomulag er í kvennaflokki þar sem allir leikirnir eru spilaðir í riðli, þar sem liðin mæta hvert öðru.

„Ég man ekki eftir að hafa séð þetta áður,“ segir Egill. Grímur hafi runnið á fólk þegar leið á leikinn og enginn virtist mættur. Mörg símtöl hafi verið tekin á meðan leikurinn var í gangi. Yfirburður Þróttar voru miklir og augljóst að Reykjavíkurmeistaratitillinn væri í höfn. Símtölin héldu áfram að leik loknum.

Loks fékk einhver skýringu frá Knattspyrnuráði Reykjavíkur sem barst manna á milli.

„Þeirri afsökun var víst kastað fram, þar sem mér þótti verið að grípa botninn á tunnunni, að þau veiti ekki verðlaunin fyrr en síðustu leikir hafa verið spilaðir.“

Hylltar í hálfleik eins og yngri flokkar?

Tveir leikir eru eftir í mótinu en breyta engu um niðurstöðuna. Því má velta fyrir sér hvernig Knattspyrnuráð Reykjavíkur ætli að haga verðlaunaafhendingunni. Eiga Þróttarastelpurnar að mæta á leik annarra liða og veita verðlaununum móttöku?

„Ég veit ekki hvort þær eigi að mæta í hálfleik á morgun á Valsleiknum eins og einhver 2. flokkur,“ segir Egill. Hann vísar til þess að yngri flokkar félaga eru oft klappaðir upp í hálfleik á heimaleik meistaraflokksliðs sama félags og hylltir af stuðningsmönnum félagsins.

„Þetta var algjört móment fyrir þennan klúbb sem var að vinna í fyrsta skipti og ágætis stemmning fyrir nokkra Þróttara sem mættu. En þetta var blaut tuska í andlitið á stelpunum.“

Þróttaraliðið er ungt að árum. Útileikmenn á aldrinum 14-22 ára og aðeins markvörðurinn sem sé skriðinn yfir þrítugt.

„Þetta eru kveðjurnar sem þær fá.“

„Ég hélt við værum komin lengra en þetta“

Fjölmörg dæmi hafa komið upp undanfarin ár þar sem verðlaun karla- eða drengjaliða hafa verið áberandi veglegri en þau sem kvenna- eða stúlknaliðin vinna. Eitt slíkt dæmi kom upp í Eyjum árið 2015 en brugðist var við ábendingum og bætt úr.

Bætt hefur verið úr í fleiri tilfellum en sumir vilja meina að enn sé langt í land að jafnrétti náist í íþróttum. 

Ríkharður Daðason, fyrrverandi landsliðsmaður í knattspyrnu og faðir leikmanns kvennaliðs Þróttar, var í Egilshöll í kvöld og lýsir uppákomunni sem sorglegri á Facebook-síðu sinni.

„Ég hélt við værum komin lengra en þetta,“ segir Ríkharður.

Uppfært 11. febrúar klukkan 14:00

KRR hefur sent frá sér yfirlýsingu og beðist afsökunar.