Sá augna­ráð víkingsins en aldrei hræðslu í augum Víkinga­prinsessunnar Söru

Wodapalooza fer fram í Miami á Flórída og er fjögurra daga keppni frá 13. janúar til 16. janúar.

Sérfræðingar Morning Chalk Up að þessu sinni voru þeir fastagestirnir Brian Friend og Patrick Clark og svo gesturinn Chase Ingraham. Þeir ræddu um kvennakeppnina við Lauren Kalil, umsjónarkonu vefvarps Morning Chalk Up.

Chase Ingraham og Patrick Clark voru nokkuð sammála um að þær sem eru líklegastar til að enda á verðlaunapallinum. Þeir nefndu Bethany Shadburne, Emma Mcquaid og Danielle Brandon en Clark talaði að auki um Dani Speegle.

Brian Friend var aftur á móti talsmaður Söru okkar Sigmundsdóttur sem keppti í síðasta mánuði á ný eftir ársfjarveru vegna krossbandsslits. Sara stóð sig vel í Dúbaí og náði sjöunda sætinu. Brian Friend var ánægður með það sem hann sá þar og spáir Söru öðru sætinu á Wodapalooza.

„Það eru nokkrar sem ættu að vera í umræðunni og þið hafið ekki talað um ennþá. Ég spái verðlaunapallinum þannig að Bethany Shadburne verði í fyrsta sætinu, Sara Sigmundsdóttir, sem þið hafi ekki talað um, verði önnur og Emma Mcquaid þriðja,“ sagði Brian Friend.

Lauren Kalil spurði Brian um það hvað það var sem hann sá hjá Söru í Dúbaí sem veldur því að hann spáir henni öðru sætinu.

„Prófið sem hún fór í gegnum í Dúbaí var fullkomið fyrir hana því hún gat ekki undirbúið sig fyrir slíkt. Að þurfa að hlaupa upp og niður í snjónum á fyrsta deginum er örugglega eitthvað ógnvænlegasta sem þú getur gert þegar þú ert að koma til baka eftir svona hnémeiðsli,“ sagði Friend.

„Svo að auki þá gerði hún ekki aðeins æfinguna þar sem hún sleit krossbandið heldur náði líka að lyfta meiri þyngd en hún hafði gert eftir krossbandsslitið. Með þessu náði hún að krossa í tvo kassa andlega og gat sagt: Ég get þetta aftur, mér líður vel og ég er komin í gegnum þetta,“ sagði Friend.

Friend sagði hafa rætt við Snorra Barón Jónsson, umboðsmann Söru, og fengið að vita að teymi Söru sé búin að fara yfir alla hluti eftir keppnina í Dúbaí.

„Þau ákváðu að fara í þessa keppni og ég sannfærður um það að þeir tækju ekki slíka áhættu nema ef hún væri klár. Hún er því augljóst heil og hún hefur keppt á Wodapalooza áður. Hún tapaði tvisvar fyrir Tiu-Clair Toomey og einu sinni fyrir Kari Pearce en hefur unnið alla aðra á þessu móti. Hún er mjög góð í þessum aðstæðum og ég held að hún verði með í baráttunni,“ sagði Friend.

Patrick Clark var í Dúbaí og fylgdist með Söru keppa á sínu fyrsta móti eftir krossbandsaðgerðina.

„Ég sá hana á staðnum og sá þá augu í víkingsins hjá henni. Hún hafði þetta augnaráð, Víkingaprinsessan sem hún er, ísdrottningin eða hvað sem fólk vill kalla hana. Hún var mætt með augnaráð villiúlfsins og ég sá aldrei neina hræðslu í augum hennar,“ sagði Patrick Clark.

„Ekki einu sinni þegar hún hljóp niður brekkuna í snjónum. Hún leit út eins og gamla Sara og hún var keppa við margar öflugar íþróttakonur á þessu móti,“ sagði Clark.

Það má heyra þau spá fyrir um mótið hér fyrir ofan.