Ræningjarnir Kasper, Jesper og Jónatan úr Kardemommubæ Þjóðleikhússins voru niðri í Laugardalshöll í morgun til að skemmta börnum, sem þangað voru komin í bólusetningu.
Börn á aldrinum fimm til ellefu ára fengu að mæta niður í Laugardal í dag til að fara í bólusetningu gegn Covid-19. Börn á þessum aldri geta mörg verið kvíðin og hrædd í þessum aðstæðum og brá Heilsugæslan því á það ráð að nota límmiða, sápukúlur og leikatriði til að létta stemninguna.
Bólusett verður alla vikuna í Laugardalshöll en víða um land hófst bólusetning barna á þessum aldri í síðustu viku.
Límmiðar, sápukúlur og leikatriði eru notuð til að reyna að létta stemmninguna við bólusetningar barna á höfuðborgarsvæðinu sem hófust með skipulegum hætti í hádeginu í dag. Allt hefur gengið vel fyrir sig þar en talsvert meiri tími fer í að bólusetja börn en fullorðna.
