Samtök atvinnulífsins leggja til aukna árangurstengingu og endurmat útgjalda ríkissjóðs og segja höfuðmáli skipta að tryggt sé að fjárveitingar skili tilætluðum árangri með markvissu endurmati útgjalda. Í umsögn þeirra kemur fram að ræða þurfi niðurstöðurnar í samhengi við fjárlagagerð, enda stuðli það að samhengi markmiðasetningar og fjárveitinga.
SA fagna því að íslensk stjórnvöld hafi nýlega hafið slíka vinnu en segja að í vinnuna þurfi stóraukinn kraft svo vel megi vera.
Talað um aðhald en minna um efndir
Samtökin gagnrýna að ítrekað sé rætt um aðhald í rekstri en þegar að er gáð sé lítið aðhald að finna í fjárlögunum. Samkvæmt útreikningum SA komi útgjöld ríkissjóðs þvert á móti til með að vaxa um 1 prósent á föstu verðlagi á milli ára þótt litið sé fram hjá niðurfelldum sértækum aðgerðum vegna faraldursins. Áhrifin séu enn meiri þegar horft er fram hjá minnkandi atvinnuleysi.
Samtökin gagnrýna að talað sé um í frumvarpinu að ekki verði stofnað til nýrra útgjalda og benda á að þvert á móti séu talin upp ýmis ný útgjöld í „samræmi við forgangsröðun nýrrar ríkisstjórnar.“
SA rökstyðja enn fremur að eðlilegt sé að útgjöld séu í samræmi við forgangsröðun yfirvalda en samhliða þurfi að tryggja að ekki sé útgjaldaaukning á þeim sviðum sem ekki eru í forgangi.
Rammasett útgjöld aukast um 30 prósent að raunvirði á árunum 2017-2022, að mati SA. Á sama tímabili er áætlað að hagvöxtur aukist um 14 prósent.
Alltof dýrir og flóknir kjarasamningar
SA leggja enn fremur til lækkun álaga og einföldun regluverks. Styðja þurfi við atvinnulífið í orði og í verki. Ein helsta hindrun fyrirtækja í þessum efnum sé launakostnaður sem þróast hefur úr takti við verðmætasköpun. Þá muni tryggingagjaldið, sem leggst ofan á laun, hækka um áramótin.
Þau leggja til framlengingu lækkunar tryggingagjalds og að tillögum OECD til umbóta á regluverki sé fylgt eftir, til að mynda í byggingariðnaði og í ferðaþjónustu.
Í umsögninni kemur einnig fram að nauðsynlegt sé að bæta umgjörð kjarasamningagerðar til að draga megi úr þeim óþarfa samfélagskostnaði sem samningagerðinni fylgir.
Þar segir að væru kjarasamningar á Íslandi jafnmargir og á Norðurlöndum miðað við höfðatölu væru þeir á bilinu 15-30 en ekki 330 eins og nú er.
SA segja umbætur á vinnumarkaðslíkaninu til þess fallnar að stuðla að skilvirkari kjarasamningagerð, launahækkunum í takti við verðmætasköpun og heilbrigðari vinnumarkaði, öllum til hagsbóta.
Innherji er nýr sjálfstæður áskriftarmiðill innan Vísis sem mun einkum beina kastljósinu að viðskiptalífinu, efnahagsmálum og stjórnmálum. Fyrst um sinn verður efnið endurgjaldslaust og aðgengilegt öllum á Vísi en með tímanum verður einungis hægt að nálgast Innherja gegn greiðslu. Áhersla er lögð á vandaðar fréttir, fréttaskýringar, viðtöl og hlaðvörp auk þess sem Innherja er ætlaður að vera vettvangur skoðanaskipta fólks úr atvinnulífinu og stjórnmálum.
