Telur of lítinn tíma til stefnu fyrir „Mílufrumvarp“

Síminn náði samkomulagi við franska sjóðastýringarfyrirtækið Ardian um kaup á Mílu sem á og rekur víðtækasta fjarskiptanet landsins í október. Samkvæmt íslenskum lögum hefur ríkið átta vikur til að gera athugasemdir við slíka sölu og þann 17. desember næstkomandi rennur sá tími út.

Viðskiptin hafa verið umdeild. Þorgerður Katrín Gunnarsdóttir, þingmaður og formaður Viðreisnar, kallaði til að mynda á dögunum eftir fundi með ráðherrum til að ganga úr skugga um að þjóðaröryggi Íslands væri ekki ógnað með sölunni. Þá kallaði Sigmundur Davíð Gunnlaugsson, þingmaður og formaður Miðflokksins, eftir því að ríkisstjórnin gripi inn í söluna og kæmi í veg fyrir hana.

Fyrsta umræða Áslaugar Örnu Sigurbjörnsdóttur vísinda-, iðnaðar- og nýsköpunarráðherra um breytingar á lögum um fjarskipti fer fram á Alþingi í dag. Frumvarpinu er ætlað að taka á ýmsum þáttum sem hafa komið upp vegna sölunnar á Mílu.  

Skilyrði við erlenda fjárfestingu

Í greinargerð með frumvarpinu kemur t.d. fram að þar séu gerðar ítarlegri kröfur til fjarskiptafyrirækja um áhættustýringu og viðbúnað. Ekki síst að því er varðar útvistun rekstrarþátta út fyrir íslenska lögsögu. Lögfest verði ákvæði sem lúta að staðsetningu fjarskiptaneta. Skýrar verði kveðið á um eftirlitsheimildir Fjarskiptastofu og hlutverk stofnunarinnar er varðar almannahagsmuni og þjóðaröryggi. Þá er lagt til að ráðherra geti bundið erlenda fjárfestingu skilyrðum í því skyni að koma í veg fyrir að hún geti ógnað öryggi landsins. 

Oddný Harðardóttir fulltrúi minnihlutans í Þjóðaröryggisráði telur þingið hafa alltof skamman tíma til að fara yfir málið. 

„Við erum hér að ræða um innviði sem eru algjör undirstaða fyrir fjarskipti á Íslandi. Þess vegna er svo mikilvægt að með lagasetningu þá getum við tryggt þjóðaröryggi og hag almennings. Þannig að það skipti ekki máli hver á eign í fjarskiptafyrirtæki. Nú er Míla að fara til erlendra aðila og mér sýnist að í frumvarpinu sé ekki kveðið nægilega fast á hvernig eigi að koma í veg fyrir útvistun afrmarkaðra þátta starfseminnar,“ segir Oddný.

Tryggja eftirlit

Oddný segir einnig gríðarlega mikilvægt að Fjarskiptastofa verði efld til muna og það komi skýrt fram í lagafrumvarpinu.

„Við verðum að fara yfir það hvernig hún er í stakk búin til að sinna  eftirliti með fjarskiptafyrirtækjum og munu þessi lög gilda um samninga sem þegar eru farnir af stað eins á við um samninginn um Mílu,“ veltir Oddný fyrir sér. 

Hún óttast að of lítill tími sé til stefnu til að tryggja þjóðarhagsmuni. 

„Þessi knappi tími eykur líkur á mistökum sem gætu dregið dilk á eftir sér,“ segir Oddný Harðardóttir.