Myndband virðist sýna herþotu hrapa í sjóinn örskömmu eftir flugtak

Á myndbandinu má sjá flugvélina í flugtaki á flugbraut skipsins. Eitthvað virðist fara úrskeiðis þannig að örfáum andartökum eftir að flugvélin fer fram af flugbraut skipsins, skýtur flugmaðurinn sér úr vélinni, sem hrapar í sjóinn. Sjá má fallhlíf opnast.

Svo virðist sem að í stað þess að hraði flugvélarinnar aukist í flugtaki hafi dregið úr hraðanum, með fyrrgreindum afleiðingum.

Hver F-35 flugvél kostar um hundrað milljón pund, rúma sautján milljarða króna.

Atvikið átti sér stað fyrr í nóvember en breskir fjölmiðlar greindu þá frá því að herþota breska hersins hefði hrapað í Miðjarðarhafið við æfingar.

Svo virðist sem að umrætt myndband sé komið úr öryggismyndavélum flugmóðurskipsins. Breska varnarmálaráðuneytið vildi ekki tjá sig um málið þegar eftir því var leitað af BBC. Þar kemur þó fram að verið sé að leita leiða til að bjarga flaki vélarinnar.

Breskir fjölmiðlar hafa greint frá því að mögulegt sé að atvikið hafi átt sér stað vegna vélarábreiðu sem mögulega hafi verið skilin eftir á flugvélinni fyrir flugtak.

Rannsókn er hafin á orsökum slyssins en í frétt BBC segir að einnig megi reikna með rannsakað verði hvernig umræddu myndbandi hafi verið lekið á netið.