Howe tekinn við Newcastle: „Þetta er stórkostlegt tækifæri“

Howe tekur við Newcastle af Steve Bruce sem nýir eigendur félagsins ráku á dögunum. Howe hefur verið án starfs síðan hann hætti hjá Bournemouth í fyrra.

Hinn 43 ára Howe stýrði Bournemouth á árunum 2008-11 og 2012-20. Hann stýrði liðinu í öllum fjórum deildunum á Englandi, þar á meðal fimm ár í ensku úrvalsdeildinni.

„Það er mikill heiður að verða þjálfari félags eins og Newcastle,“ sagði Howe í fréttatilkynningu frá Newcastle.

„Þetta er stórkostlegt tækifæri en það er mikil vinna fyrir höndum. Ég iða í skinninu að komast á æfingasvæðið og vinna með leikmönnunum.“

Eftir að Bruce var rekinn reyndi Newcastle að fá Unai Emery, knattspyrnustjóra Villarreal, en án árangurs. Þá sneru sádí-arabískir eigendur Newcastle sér að Howe.

Hans bíður krefjandi verkefni en Newcastle er í nítjánda og næstneðsta sæti ensku úrvalsdeildarinnar og er eina lið deildarinnar sem hefur ekki enn unnið leik.

Fyrsti leikur Newcastle undir stjórn Howes er gegn nýliðum Brentford laugardaginn 20. nóvember.