Tekist á um orkustefnu í stjórnarmyndunarviðræðum

Formenn stjórnarflokkanna hafa nú rætt saman í tvær vikur um möguleika á að mynda nýja ríkisstjórn saman. Ekki sér fyrir endan á viðræðunum en öll telja þau eðlilegt að viðræðurnar taki nokkur tíma.

Ýmis ljón eru í veginum sem komast þarf framhjá eins og mismunandi áherslum flokkanna í orkumálum. Bjarni Benediktsson formaður Sjálfstæðisflokksins segir formennina hafa rætt heiðarlega um skoðanamun á einstaka málum og reynt að finna lausn á þeim. Þar undir séu til dæmis hálendisþjóðgarður og rammáætlun um vernd og nýtingu orkuauðlinda.

„Ef við ætlum að fara í alvöru í orkuskipti þarf orku og það þarf græna orku. Þess vegna er okkur mikið í mun, að minnsta kosti okkur í Sjálfstæðisflokknum, að reyna að slípa til ferla. Þannig að það séu ekki flöskuhálsar í kerfunum sem koma í veg fyrir að við náum árangri í orkuskiptum,“ segir Bjarni.

Auður Anna Magnúsdóttir arftaki Guðmundar Inga Guðbrandssonar umhverfis- og auðlindaráðherra í starfi framkvæmdastjóra Landverndar talar til þessarra sjónarmiða í grein á Vísi í dag.

Forsvarsmenn stórra orkufyrrtækja hafi sagt bráðnauðsynlegt að taka faglega ferla í lögum úr sambandi við ákvarðanir um virkjanir. Á Íslandi væri nú þegar framleidd mest orka í heiminum á hvern íbúa þar sem stóriðjan taki til sín 80 prósent allrar raforku í landinu. Sjálfbærasta loftlagsaðgerðin væri aftur á móti að nota minni orku og nýta hana betur.

„Látum ekki glepjast af áróðursherferð hins óseðjandi orkuiðnaðar gegn íslenskri náttúru,“ segir orðrétt í greininni. Bjarni bendir hins vegar á að ekki hafi verið samþykkt ný rammaáætlun frá árinu 2013 en hana beri að gera á fjögurra ára fresti.

Sigurður Ingi Jóhannsson formaður Framsóknarflokksins tekur í svipaðan streng.

„Hluti af loftlagslausninni á næstu árum eru grænar fjárfestingar sem byggja á grænni orku. Við erum svo heppin hér á Íslandi að við erum annars vegar mjög rík af orku nú þegar en líka af þeim möguleikum að geta gert betur,“ segir Sigurður Ingi.

Katrín segir rætt um fleira en orkumál

Katrín Jakobsdóttir formaður Vinstri grænna segir að auðvitað sé áherslumunur á milli flokkanna.

„Þessar viðræður snúast auðvitað ekki bara um þessi mál. Það eru fleiri mál sem ekki var lokið við á síðasta kjörtímabili. Flokkarnir voru síðan með sínar áherslur fyrir kosningar sem auðvitað þarf að fara í gegnum og meta hvað sé hægt að gera í hverjum og einum málaflokki. Þannig að það er ekki óeðlilegt að þetta taki sinn tíma,“ segir Katrín.

Í hádegisfréttum Bylgjunnar sagði Bjarni aðspurður að Sjálfstæðisflokkurinn hefði áhuga á að taka við heilbrigðismálunum. Þau væru stór og mikilvægur málaflokkur sem tæki til sín um fjórðung allra útgjalda ríkisins. En í þeim málaflokki hefur einnig verið hugmyndafræðilegur ágreingur. Sérstaklega á milli þingmanna Sjálfstæðisflokksins og Vinstri grænna.

Katrín segir viðræður formannanna ekki komnar það langt að farið væri að skipta ráðuneytum. Það kæmi vel til greina að stokka upp í ráðuneytum og færa verkefni á milli þeirra.

„Þetta snýst auðvitað ekki um einhver flokkur sleppi ráðuneyti og einhver annar sækist eftir því. Mér hefur nú heyrst að allir þessir flokkar séu tilbúnir í flest ráðuneyti sem eru í boði ef ekki öll. Þessir flokkar eru með stefnu í öllum þessum málaflokkum þannig að sjálfsögðu er áhugi á því. Það er hins vegar eitthvað sem við munum ræða síðar,“ segir Katrín Jakobsdóttir.