Líklegt byrjunarlið Íslands: Hannes Þór milli stanganna, Kári fyrirliði og Albert fremstur

Leikur kvöldsins er fyrsti af þremur á skömmum tíma. Ísland mætir Rúmeníu í kvöld, Norður-Makedóníu á sunnudag og Þýskalandi á miðvikudag. Leikið er þétt og má reikna með að margir leikmenn taki þátt í leikjunum þremur sem fara allir fram á Laugardalsvelli.

Arnar Þór Viðarsson og Eiður Smári Guðjohnsen vilja spila 4-3-3 með einn djúpan miðjumann og tvær „áttur“ ef svo má að orði komast. Vísir telur að liðinu verði stillt upp nokkurn veginn svona í kvöld.

Markvörður: Hannes Þór Halldórsson

Okkar reyndasti markvörður og eini sem er í leikformi um þessar mundir. Nokkuð einfalt val hvað það varðar.

Hægri bakvörður: Alfons Sampsted

Spilar fyrir Noregsmeistara Bodo/Glimt og virðist vera að taka yfir stöðu hægri bakvarðar í landsliðinu. Einkar sókndjarfur og skemmtilegur nútíma bakvörður.

Vinstri bakvörður: Ari Freyr Skúlason

Vinstri bakvarðarstaðan er ákveðin vandræðastaða þar sem Hörður Björgvin Magnússon er meiddur. Ari Freyr er í hópnum ásamt Guðmundi Þórarinssyni. Vísir telur að Arnar Þór haldi Ara Frey í liðinu í kvöld en Guðmundur mun þá að öllum líkindum spila gegn Norður-Makedóníu.

Miðverðir: Kári Árnason og Hjörtur Hermannsson

Í viðtali fyrir leikina var Kári eini leikmaður liðsins sem var eitthvað tæpur en það eru þó allar líkur á að hann spili í kvöld. Ef hann spilar eru einnig nær allar líkur á að hann beri fyrirliðaband Íslands.

Með honum í hjarta varnarinnar verður Hjörtur Hermannsson. Sá stóð sig með prýði í miðverði í vináttuleikjum Íslands fyrr á árinu og er í fínu leikformi um þessar mundir.

Djúpur á miðju: Guðlaugur Victor Pálsson

Það virðist nær öruggt að Guðlaugur Victor verður fyrir framan vörnina og sér um að verja hana eftir bestu getu ásamt því að styðja við sókn liðsins.

Miðjumenn: Birkir Bjarnason og Ísak Bergmann Jóhannesson

Þegar kemur að miðjumönnum liðsins vandast valið. Birkir Bjarnason býður upp á mikla reynslu og byrjar eflaust leikinn. Spurningin er hver verður með honum á miðri miðjunni. Ísak Bergmann Jóhannesson getur leyst þá stöðu en hefur oftar en ekki spilað sem vængmaður með bæði A og U-21 árs landsliðinu.

Ásamt Ísaki Bergmanni eru þeir Andri Fannar Baldursson, Þórir Jóhann Helgason og Arnór Sigurðsson í hópnum. Ættu þeir allir að geta leyst þessa stöðu.

Vinstri vængur: Jón Dagur Þorsteinsson

Jón Dagur var fyrirliði íslenska U-21 árs landsliðsins sem fór í lokakeppni EM fyrr á þessu ári. Gæti fengið stóra tækifærið nú í kvöld.

Hægri vængur: Jóhann Berg Guðmundsson

Einn reynslumesti og besti leikmaður liðsins. Virkar í góðu standi og laus við meiðsli svo hann ætti að eiga öruggt sæti í byrjunarliðinu.

Framherji: Albert Guðmundsson

Hefur ekki oft spilað í stöðu fremsta manns hjá íslenska landsliðinu. Fær það hlutverk að öllum líkindum í kvöld þar sem Andri Lucas Guðjohnsen á enn eftir að spila A-landsleik og Viðar Örn Kjartansson var ekki í upphaflega hópnum fyrir leikina þrjá.

Leikur Íslands og Rúmeníu hefst klukkan 18.45 og verður í beinni textalýsingu á Vísi.