Osaka ekki með á Wimbledon en stefnir á að keppa á Ólympíuleikunum á heimavelli

Osaka hætti keppni á Opna franska meistaramótinu í síðasta mánuði. Hún mætti ekki á blaðamannafund eftir sigur á Patriciu Mariu Tig í 1. umferð mótsins þar sem hún vildi vernda andlega heilsu sína.

Hún var sektuð fyrir að mæta ekki á blaðamannafundinn og skipuleggjendur mótsins hótuðu að henda henni úr leik. Osaka hætti hins vegar sjálf og sagðist ætla að taka sér frí frá tennis um óákveðinn tíma.

Osaka, sem er í 2. sæti heimslistans, hefur nú ákveðið að keppa ekki á Wimbledon sem hefst 28. júní. Hún ætlar hins vegar að keppa á Ólympíuleikunum í Tókýó sem hefjast í næsta mánuði. Osaka segist vera spennt að spila fyrir framan landa sína á Ólympíuleikunum.

Osaka, sem er 23 ára, vann Opna ástralska meistaramótið fyrr á þessu ári. Það var hennar fjórði sigur á risamóti á ferlinum. Hún vann Opna ástralska 2019 og Opna bandaríska 2018 og 2020.