Rosengård með fullt hús stiga á toppnum eftir stór­sigur | Svein­dís Jane sneri aftur í tapi

Í Stokkhólmi tóku Hallbera Guðný Gísladóttir og stöllur hennar í AIK á móti Glódísi Perlu Viggósdóttur og liðsfélögum hennar í Rosengård. AIK eru nýliðar í deildinni á meðan Rosengård er með betri liðum deildarinnar og til að gera langa sögu stutta þá unnu gestirnir stórsigur.

Þrjú mörk í fyrri hálfleik og fjögur í þeim síðari þýddu að lokatölur leiksins voru 7-0 gestunum í vil.

Hallbera Guðný spilaði allan leikinn í vinstri vængbakverði AIK á meðan Glódís Perla var á sínum stað í hjarta varnar Rosengård. Glódís Perla stefnir hraðbyr á sænska meistaratitilinn en Rosengård er á toppi deildarinnar með fullt hús stiga að loknum sjö leikjum.

AIk er í 9. sæti deildarinnar með einn sigur, þrjú jafntefli og þrjú töp að loknum sjö leikjum. Fyrir leik kvöldsins hafði liðið fengið á sig 11 mörk og því kom fjöldi marka Rosengård töluvert á óvart.

Þá tapaði Kristianstad nokkuð óvænt fyrir Hammarby á útivelli, lokatölur 3-1. Sif Atladóttir lék allan leikinn í vörn Kristanstad og nældi í gult spjald á 71. mínútu leiksins. Sveindís Jane hóf leikinn á bekknum en kom inn þegar tæpur hálftími var til leiksloka.

Sveindísi Jane tókst ekki að setja mark sitt á leikinn að þessu sinni en staðan var 3-1 er hún kom inn af varamannabekknum.

Um er að ræða fyrsta tap Kristianstad á tímabilinu en liðið er í 4. sæti með 12 stig að loknum sjö leikjum.

Sænska úrvalsdeildin er á Stöð 2 Sport en upplýsingar um útsendingar má finna hér. Sænski boltinn er hluti af Stöð 2 Sport Erlent sem kostar 3.990 krónur á mánuði en einnig má kaupa útsendingar sem stakan viðburð á 990 krónur.