Aron Kristjánsson: Við vorum í bílstjórasætinu allan leikinn en Fram var aldrei langt undan

„Ég er ánægður með þessi tvö stig og við erum einu skrefi nær deildarmeistaratitlinum. Við vorum í bílstjóra sætinu allan leikinn en Framarar aldrei langt undan og eiga hrós skilið fyrir góða baráttu,“ sagði Aron Kristjánsson, þjálfari Hauka, eftir sigur á Fram í dag.

Jafnræði var með liðunum bróðurpart leiksins þar til Haukar komu sér í ágætis forystu á loka mínútum leiksins.

„Mér fannst Framararnir gefa allt í þennan leik, þeir seldu sig dýrt, börðust eins og ljón allan leikinn, þetta var hörkuleikur, þangað til að nokkrar mínútur voru eftir þar sem við náum að nýta okkur mistökin þeirra og ná ágætis forskoti.“

Þrátt fyrir að hafa sigrað í dag var Aron ekki sáttur með varnarleik sinna manna.

„Menn mættu svolítið værukærir, varnarlega, til leiks. Það vantaði þessa vinnslu sem hefur verið svo góð hjá okkur, betri fræslur, staðið betur á móti þeim leikmönnum sem eru að sækja á okkur. Í dag vorum við flatir, það var of langt á milli manna.“

Næsti leikur Hauka er nágrannaslagur á móti FH.

„Það er nýr leikur, nýr andstæðingur og allt öðruvísi andstæðingur. Það verður hörkuleikur þar sem að bæði lið vilja taka stigin. Við munum gera allt til þess að gera það,“ sagði Aron að lokum.