Laporte hetjan á Wembl­ey og fjórði í röð hjá City

Manchester City er enskur deildarbikarmeistari etir 1-0 sigur á Tottenham í úrslitaleiknum á Wembley í dag. Þetta er fjórða árið í röð sem City vinnur titilinn.

Ryan Mason var að stýra Tottenham í sínum öðrum leik eftir að hann tók við stjórnartaumunum eftir brottrekstur Jose Mourinho á meðan þrautreyndur Pep Guardiola var á hinum bekknum.

Það var fátt um fína drætti í fyrri hálfleik. City var meira með boltann og sótti meira en Hugo Lloris, í marki Tottenham, var vel á verði og greip inn í þegar þess á þurfti. Markalaust í hálfleik.

Í síðari hálfleik áttu bæði lið góðar sóknir en það var hins vegar níu mínútum fyrir leikslok sem sigurmarkið var skorað. Sergio Aurier braut klaufalega af sér og aukaspyrna Kevin De Bruyne rataði beint á kollinn á Aymeric Laporte.

Það reyndist sigurmarkið í leiknum og City því að vinna enska deildarbikarinn fjórða árið í röð. Liðið getur því unnið þrennuna en liðið er í undanúrslitum Meistaradeildarinnar sem og í efsta sæti ensku úrvalsdeildarinar.