Horfði á sprunguna opnast í Geldingadölum

„Þegar ég var að horfa og borða nesti með afa þá kom allt í einu svona dynkur. Svo sáum við að það kom gusa upp úr jörðinni aftan á og þá var bara komið nýtt eldgos,“ sagði Hugi Þór Snorrason.

Fljótlega sáu þeir eldtungur spýtast úr sprungunni. Þetta var fyrsta ferð þeirra beggja að gosstöðvunum og lýsir Hugi Þór gosinu sem mikilfenglegu.

Hvernig myndir þú útskýra fyrir krökkunum í skólanum hvernig það var að sjá eldgosið?

„Það var svona rosa heitt á sumum stöðum og spýttist upp úr því.“

Hugi Þór segist ekki hafa orðið vitund hræddur og hélt ró sinni. Hann er viss um að hann muni eftir atvikinu lengi.

En hvernig lykt var af gosinu? 

„Brunalykt svona eins og á áramótunum,“ sagði Hugi Þór.