Opna skóla eftir páskafrí með svipuðum takmörkunum og í haust

Sóttvarnarlæknir hefur lagt til við ráðherra að skólar verði opnaðir eftir páskafrí. Stuðst verði við samskonar samkomutakmarkanir og voru í gildi í haust.

Lilja Dögg Alfreðsdóttir segir reglugerð um opnun skóla koma fram fljótlega. 

„Þetta verður með einhverjum takmörkunum.  Við erum svolítið að fara inní stöðuna eins og við vorum í áður. Við stefnum í að fara að opna skóla og erum að fara að gefa út þá reglugerð innan skamms.

Hertar sóttvarnaaðgerðir tóku gildi á fimmtudaginn í síðustu viku. Þá var meðal annars grunnskólum, framhaldsskólum og háskólum gert að loka en ólíkt öðrum aðgerðum sem gripið var til gildir reglugerðin um skólastarf aðeins til og með 31. mars.

Síðan tekur við páskafrí í skólum en aðrar sóttvarnaaðgerðir gilda til og með 15. apríl.

„Við erum að fara inní stöðuna eins og hún var í haust en tímabundið vegna þess að við höfum mikla trú á þeim aðgerðum sem farið var í,“ segir Lilja.