Fljúga yfir gos­stöðvarnar til að meta um­fang hraunsins og hraun­flæðið

Sigþrúður Ármannsdóttir, náttúruvársérfræðingur á Veðurstofu Íslands, segir að farið verði í vísindaflug yfir gosstöðvarnar í dag. Þá verði að öllum líkindum slegið á umfang hraunsins og reynt að meta hraunflæðið.

Hún segir að ekki hafi ný gossprunga opnast á svæðinu og þá sé heldur ekki að sjá að nýr gígur hafi myndast.

Mikið hefur verið rætt um gasmengun frá gosinu og var svæðinu til að mynda lokað af almannavörnum í gær þar sem sagt var að gasmengun væri farin yfir hættumörk.

Sigþrúður segir að sérfræðingar Veðurstofunnar hafi farið til mælinga á svæðinu í gær. Niðurstöður liggja ekki fyrir en ættu að koma með morgninum.

Miðað við veðurspána sé þó ekki vænlegt að vera á svæðinu seinnipartinn í dag og jafnvel heldur ekki á morgun þar sem vindur gæti dottið niður við gosstöðvarnar og hættuleg gasefni safnast fyrir í dældum. Það geti verið mjög lúmskar aðstæður.

Alls mældust 160 jarðskjálftar á Reykjanesskaganum í gær og var sá stærsti 2,9 að stærð. Hann varð aðfaranótt mánudags og átti upptök sín um kílómetra suðvestur af Keili.

Frá miðnætti í dag hafa mælst sextíu skjálftar á skaganum, sá stærsti 1,9 að stærð með upptök um tvo kílómetra norðvestur af Reykjanestá.