Repúblikanar reyna víða að gera fólki erfiðara að kjósa

Við viðleitni þeirra til að draga úr kosningaþátttöku geta Repúblikanar ekki vísað í gögn eða vísbendingar um kosningasvindl heldur tortryggni gagnvart kosningakerfi Bandaríkjanna. Það er tortryggni sem Repúblikanar hafa sjálfir byggt upp á undanförnum mánuðum og árum með Donald Trump, fyrrverandi forseta, í fararbroddi.

Í samantekt Washington Post segir að þingmenn í 33 ríkjum hafi samið rúmlega 160 frumvörp sem ætlað sé að draga úr kosningaþátttöku.

Ásakanir Trumps og bandamanna hans um að umfangsmikið kosningasvindl hafi kostað hann sigur í forsetakosningunum í fyrra, hafa leitt til þess að stór hluti kjósenda Repúblikanaflokksins stendur í þeirri trú að svo sé. Það er þó Trump-liðar hafi ekki getað fært sannanir fyrir því og embættismenn og sérfræðingar segja það rangt.

William Barr, fyrrverandi dómsmálaráðherra Bandaríkjanna, gaf út í lok síðasta árs að engar vísbendingar lægju fyrir um að stórfellt kosningasvindl hefði átt sér stað. Í kjölfar þess versnaði samband hans og Trumps verulega og Barr endaði á því að hætta skömmu fyrir embættistöku Bidens.

Trump sagði sambærilega hluti um forsetakosningarnar 2016, sem hann vann. Þá sagði hann umfangsmikið kosningasvindl hafa kostað sigi meirihluta atkvæða á landsvísu en Hillary Clinton fékk fleiri atkvæði en hann.

Þessa tortryggni sem Repúblikanar hafa búið til, ætla þeir nú að nota

Viðleitni þessi á sér stað í mörgum þeim ríkjum þar sem Repúblikanar ráða ríkjum. Þeirra á meðal eru Arizona, Flórída, Georgía, Texas, Pennsylvanía, Michigan og Wisconsin. Forsvarsmenn þessara breytinga segja þær nauðsynlegar því svo margir kjósendur standi í þeirri trú að Joe Biden hafi unnið kosningarnar í fyrra með svindli.

Washington Post hefur þó eftir Repúblikönum í Georgíu að þessi viðleitni flokksmanna sé vopn í höndum Demókrata sem muni geta notað hana til að fylkja saman liði í þingkosningum næsta árs.

Þingmaðurinn Alan Powell sagði nýverið að það skipti í raun ekki máli hvort svindl hefði átt sér stað í kosningunum í nóvember. Það skipti bara máli að margir haldi að svo hafi verið.

Einn viðmælandi miðilsins, Repúblikani í Georgíu sem vildi ekki láta nafns síns getið, sagði þetta heimskulegt. Repúblikanar væru að gefa Demókrötum hafnaboltakylfu sem þeir gætu svo barið Repúblikana með.

Sú þróun er þegar byrjuð í Georgíu þar sem Repúblikanar vilja meðal annars gera fólki erfiðara að koma höndum yfir utankjörfundaratkvæðaseðil og sömuleiðis koma í veg fyrir að samtök geti gert fólki auðveldara að bíða í röðum við kjörstaði, til dæmis með því að dreifa vatnsflöskum og teppum.

Seth Bringman, talsmaður samtaka sem stjórnmálakonan Stacey Abrams stofnaði, lýsti því fljótt yfir að Repúblikanar viti vel að þeldökkir Bandaríkjamenn séu líklegastir til að nýta sér utankjörfundaratkvæði og að þeldökkir kjósendur hafi nýverið tryggt Demókrataflokknum tvö öldungadeildarsæti Georgíu.

Blaðamenn AP fréttaveitunnar hafa skoðað aðgerðir Repúblikana í Flórída sérstaklega. Þær þykja nokkuð merkilegar fyrir þær sakir að Repúblikanar hafa lengi talað vel um kosningakerfi Flórída og það gerði Trump sjálfur í aðdraganda kosninganna í fyrra.

Af þeim rúmlega fimmtíu dómsmálum sem Trump-liðar og bandamenn Trumps höfðuðu, og töpuðu, vegna kosninganna var ekki eitt höfðað í Flórída. Enda vann Trump þar.

Repúblikanar hafa lengi verið með yfirhöndina varðandi póstatkvæði í Flórída og í aðdraganda kosninganna lýsti Trump því yfir að kosningakerfið þar væri öruggt, þvert á yfirlýsingar hans varðandi önnur ríki Bandaríkjanna.

Það gerðist þó í fyrsta sinn í Flórída að fleiri greiddu Demókrötum atkvæði sitt í gegnum póst en Repúblikönum.

Ron DeSantis, ríkisstjóri, leiðir nú viðleitni Repúblikana í Flórída til að draga úr kjörsókn þar. Þó hann hafi sjálfur lýst því yfir í nóvember að kjörstjórnir Flórída hefðu staðið sig stórkostlega vel. Hann lagði í gær fram tillögur sem snúa meðal annars að því að gera fólki erfiðara að notast við póstatkvæði og annarskonar utankjörfundaratkvæði. Sagði hann markmiðið að koma í veg fyrir kosningasvindl.

DeSantis verður sjálfur á kjörseðlum næsta árs og reglubreyting hans myndi í rauninni afnema þann árangur sem Demókratar náðu í ríkinu í nóvember. Sérstaklega með því að þvinga kjósendur til að sækja um utankjörfundaratkvæðaseðla á hverju ári í stað á hverjum tveimur árum, eins og reglurnar eru núna.

Sérfræðingar sem blaðamenn AP ræddu við segja að breytingartillögur DeSantis muni koma sérstaklega niður á fátækari og minna menntuðum kjósendum sem hafi ekki mikla reynslu af atkvæðagreiðslu.

Ásakanir Trump-liða varðandi kosningarnar hafa að miklu leyti snúið að því að mikill meirihluti utankjörfundaratkvæða voru til Bidens en ekki Trumps. Það hefur þó legið fyrir lengi að kjósendur Demókrataflokksins væru mun líklegri til að nýta sér slíka atkvæði en kjósendur Trumps. Þá að miklu leyti vegna þess að Trump sagði stuðningsmönnum sínum ítrekað að greiða ekki atkvæði í gegnum póst.

Þá höfðu Repúblikanar víða meinað kjörstjórnum að telja utankjörfundaratkvæði fyrir kosningadag svo talning atkvæða tafðist víða með fleiri slíkum atkvæðum en venjulega.