Andrés fann samhljóm með Pírötum

Hann hefur verið utan þingflokka frá því í nóvember 2019, þegar Andrés sagði sig úr þingflokki Vinstri grænna. Hann segir einnig að skilvirkara sé að vera í þingflokki og þannig komist meira í verk.

„Að hluta til er þetta praktíst atriði. Það er meiri slagkraftur að vera mörg saman og við getum deilt verkum. Síðan náum við meiru fram,“ sagði Andrés í kvöldfréttum Stöðvar 2.

Andrés segist hafa skoðað alla kosti og segist hafa unnið vel með þingflokki Pírata að mörgum málum. Hann væri oft sammála meðlimum þingflokksins varðandi ýmis málefni eins og loftlags- og mannréttindamálum og eflingu lýðræðis.

„Þá fannst mér við passa saman,“ sagði Andrés í kvöldfréttum Stöðvar 2.

Andrés ætlar að gefa kost á sér í prófkjöri Pírata í Reykjavík Norður. Þeir sem vilja taka þátt í því prófkjöri Pírata þurfa að skrá sig í flokkinn á morgun. Framboðin eru þó opin lengur.