Oddur og Sigvaldi atkvæðamiklir í sigurleikjum og Viggó markahæstur í tapi

Sigvaldi Björn Guðjónsson var öflugur þegar lið hans, Kielce, vann öruggan sigur í pólsku úrvalsdeildinni í handbolta í kvöld.

Sigvaldi skoraði níu mörk í tíu marka sigri, 38-28, á Mielec og var hægri hornamaðurinn því markahæsti leikmaður vallarins.

Ungstirnið Haukur Þrastarson er einnig á mála hjá Kielce en hann er fjarri góðu gamni vegna meiðsla þessa dagana.

Kielce er langbesta liðið í pólskum handbolta og hefur fullt hús stiga á toppi deildarinnar.

Einnig voru Íslendingar í eldlínunni í þýsku úrvalsdeildinni í handbolta í kvöld.

Þar gerði Oddur Gretarsson fjögur mörk úr fimm skotum þegar lið hans, Balingen, vann öruggan útisigur á Minden, 20-27.

Viggó Kristjánsson var markahæstur í liði Stuttgart sem beið lægri hlut fyrir Coburg, 23-29. Viggó gerði sex mörk úr átta skotum.