Minnti foreldra á að mæta ekki - Sjö fullorðnir á fjórðungi vallar

Eysteinn Pétur Lárusson, framkvæmdastjóri Breiðabliks, minnir á að eins gleðilegt og það sé að skipulagt íþróttastarf barna hefjist aftur á mánudaginn þá verði fólk að fara varlega.

Eysteinn var á meðal þeirra sem sátu fyrir svörum á upplýsingafundi almannavarnadeildar ríkislögreglustjóra í dag, sem fulltrúi íþróttafélaganna sem boðað hafa börn á grunn- og leikskólastigi aftur á æfingar í næstu viku. Hann segir foreldra og aðra aðstandendur verða að gæta að því að þeim sé ekki heimilt að mæta á æfingarnar.

„Okkur íþróttafélögunum er sýnt mikið traust með þessari fyrstu afléttingu fyrir íþróttastarfið, og að sama skapi er þetta mikil ábyrgð sem við þurfum að sýna með því að standa í fæturna til að þetta fyrsta skref takist sem best. Við þurfum að virða öll tilmæli sem gefin hafa verið út um útfærsluna, og fara ekki of geyst af stað. Það er betra að taka eitt skref í einu í stað þess að ætla sér um of og þurfa að fara aftur á byrjunarreit,“ segir Eysteinn, en gangi allt að óskum ætla Blikar sér að halda Símamótið í júlí, stærsta krakkamót hvers fótboltasumars.

„Varðandi íþróttastarfið hjá börnum og unglingum viljum við biðja til foreldra iðkenda um að virða það að engir áhorfendur eru leyfðir á æfingum og í keppni eftir þessa fyrstu afléttingu samkomubanns. Við þurfum öll að sýna ábyrgð í sameiningu. Við félögin viljum vera til fyrirmyndar, og það verða aðeins þjálfarar og aðstoðarþjálfarar á æfingum í þessum fyrsta fasa. Ábyrgðin hér liggur líka hjá foreldrum og forráðamönnum til að láta þetta ganga sem best. Það sama á við um allt mótahald í sumar, við ætlum að reyna að halda okkar striki þar og því enn mikilvægara en ella að þetta gangi sem best,“ segir Eysteinn.

Tveggja metra reglan í gildi á æfingum fullorðinna

Þó að börn geti snúið aftur til æfinga á mánudag verða æfingar fullorðinna ströngum skilyrðum háð enn um sinn. KSÍ bendir á heimasíðu sinni á að í fótboltanum muni leikmenn í meistaraflokki og 2. flokki geta æft sjö saman á einum fjórðungi knattspyrnuvallar, auk eins þjálfara. Þetta á við bæði í knatthöllum og utandyra. Eftirfarandi skilyrði skulu einnig höfð í huga:

• Mikilvægt er að hver eining hafi sinn eigin inn- og útgang
• Mikilvægt er að afmarka hverja einingu vel, t.d. með keilum eða borða
• Til þess að forðast smit milli hópa þá er mikilvægt að sömu 7 einstaklingarnir séu alltaf saman í hóp - ekki blanda hópum á æfingum eða milli æfinga
• Tveggja metra reglan er enn í fullu gildi

Íþróttasamböndin munu funda með almannavarnadeild á morgun til að fá svör við ýmsum spurningum og Eysteinn hvetur fólk til að fara varlega af stað.

„Varðandi íþróttastarfið hjá fullorðnum 16 ára og eldri, þá eru takmarkanir fleiri þar og keppni óheimil nema að hægt sé að uppfylla skilyrði um tveggja metra fjarlægðarreglu og önnur skilyrði. Að sama skapi er hér auðvelt að fara fram úr sér og það þarf ekki nema einn vitleysing sem fer ekki eftir þeim tilmælum sem sett hafa verið til að skemma fyrir öllum hinum,“ sagði Eysteinn.