Tölurnar mögnuðu frá landsliðsferli Guðjóns Vals sem spannaði 21 ár

Guðjón Valur Sigurðsson hefur leikið sinn síðasta handboltaleik á ferlinum og um leið síðasta leik sinn fyrir íslenska landsliðið. Hann leggur landsliðsskóna á hilluna eftir að hafa skorað 1879 mörk í 365 leikjum.

Enginn handboltamaður í sögu handboltans í heiminum hefur skorað oftar fyrir landslið sitt en einmitt Guðjón Valur en hann bætti markmet Ungverjans Péter Kovács í janúar 2018. Kovács skoraði á sínum tíma 1798 fyrir Ungverja en Guðjón Valur endar sinn feril 81 marki á undan gamla methafanum.

Áður hafði Guðjón Valur Sigurðsson slegið markamet Ólafs Stefánssonar með íslenska landsliðinu. Ólafur skoraði á sínum tíma 1579 mörk fyrir íslenska landsliðið en Guðjón Vakur endar landsliðsferilinn nákvæmlega 300 mörkum á undan honum.

Hér fyrir neðan má sjá ýmsar tölfræðistaðreyndir frá þessum magnaða landsliðsferli Guðjóns Vals.

22  Guðjón Valur tók þátt í 22 stórmótum með íslenska landsliðinu en það fyrsta var EM í Króatíu 2000 og það síðasta EM í Svíþjóð, Noregi og Austurríki fyrr á þessu ári. Guðjón Valur var með á ellefu Evrópumótum, átta heimsmeistaramótum og þremur Ólympíuleikum.

701 Guðjón Valur skoraði alls 701 mark í 138 leikjum á stórmótum með íslenska landsliðinu eða 5,1 mark í leik. Hann skoraði 194 mörkum fleira en næstmarkahæsti Íslendingurinn á stórmótum sem var Ólafur Stefánsson (507 mörk í 107 leikjum).

8 Guðjón Valur hefur skorað yfir hundrað mörk á átta landsliðsárum, náði því fyrst árið 2003 (138 mörk) og síðasti árið 2013 (105 mörk).

199 Guðjón Valur hefur mest skorað 199 mörk á einu landsliðsári en því náði hann í 35 leikjum á árinu 2008. Guðjón skoraði 5,68 mörk í leik á þessu ár þar sem Ísland vann silfur á Ólympíuleikunum í Peking.

8,08 Hæsta meðalskora Guðjóns Vals á einu ári var árið 2013 þegar hann skoraði 105 mörk í aðeins þrettán landsleikjum eða 8,08 að meðaltali í leik.

341 Guðjón Valur skoraði langflest marka sinna í Laugardalshöllinni en þau urðu alls 341 í 53 leikjum eða 6,43 að meðaltali í leik. Næst kom Kaplakriki þar sem Guðjón skoraði 68 mörk.

28 Guðjón Valur lék flesta landsleiki á móti Þjóðverjum eða 28 talsins en hann spilaði 26 leiki á móti Noregi og 25 leiki á móti bæði Danmörku og Frakklandi.

140 Guðjón Valur skoraði flest mörk með íslenska landsliðinu á móti Póllandi eða alls 140 í 23 leikjum sem eru 6,09 mörk í leik. Guðjón Valur skoraði einnig yfir hundrað landsliðsmörk í leikjum á móti Noregi (125), Danmörku (114), Þýskalandi (111) og Slóveníu (108).

101 Guðjón Valur spilaði landsleiki þegar hann var leikmaður átta mismundandi félagsliða. Hann byrjaði sem leikmaður KA (34 leikir) og endaði sem leikmaður Paris Saint Germain í Frakklandi (8). Flesta leiki spilaði hann þó sem leikmaður þýsku liðanna Essen (101 leikur), Gummersbach (76 leikir) og Rhein-Neckar Löwen (70 leikir).

184 Guðjón Valur lék flesta leiki (184) og skoraði flest mörk (911) þegar Guðmundur Guðmundsson var landsliðsþjálfari. Hann skoraði 345 mörk í 51 leik þegar Aron Kristjánsson þjálfaði landsliðið en spilaði einnig landsleiki fyrir Alfreð Gíslason (39), Viggó Sigurðsson (38), Þorbjörn Jensson (29) og Geir Sveinsson (24).

15 og 17 Guðjón Valur skoraði mest sautján mörk í einum landsleik en það var á móti Katar á Umbro æfingamótinu í Kristiansund í Noregi 13. janúar 2006. Guðjón Valur skoraði mest 15 mörk í leik á stórmóti en það gerði hann á móti Ástralíu í Magdeburg á HM 2007 Þýskalandi.