Óttast að að­eins „pínu­lítill hundraðs­hluti þjóðarinnar“ verði bólu­settur fyrir lok næsta árs

Þetta segir Kári í samtali við Fréttablaðið í dag. „Það eru engar dagsetningar í þessu. Þetta byggir náttúrulega á samningum Evrópusambandsins og enn einu sinni virðist Evrópusambandið vera að klúðra málum. Ef svo heldur fram sem horfir, þá er hætta á því að við verðum ekki búin að bólusetja nema pínulítinn hundraðshluta af þjóðinni í lok næsta árs,“ segir Kári.

Fyrstu bóluefnisskammtarnir frá lyfjaframleiðandanum Pfizer komu til landsins í fyrradag og fyrri umferð bólusetninga með skömmtunum tíu þúsund kláraðist í gær. Þá var einnig undirritaðir samningur um kaup á bóluefni við lyfjaframleiðandann Moderna í gær, auk viðbótarsamnings við Pfizer.

Með samningunum eru Íslandi tryggðir skammtar af bóluefni fyrir 189 þúsund manns. Alls hafa stjórnvöld tryggt skammta fyrir rúmlega 500 þúsund manns frá fjórum framleiðendum, samkvæmt upplýsingum frá heilbrigðisráðuneytinu.

„Klúður“ Evrópusambandsins

Kári hefur áður gagnrýnt það að Ísland skuli hafa samið við lyfjaframleiðendur í gegnum Evrópusambandið. Þetta ítrekar hann í samtali við Fréttablaðið í dag.

„[…] en við erum bara því miður á þeim stað að Evrópusambandið klúðraði þessu. Við verðum að horfast í augu við það og ekki reyna að sannfæra okkur og aðra um að þetta sé allt í lagi, því þetta er ekki í lagi.“

Hann segir mikilvægt að kenna ekki stjórnvöldum um heldur beina spjótunum að Evrópusambandinu. Einnig sé mikilvægt að tryggja landsmönnum bóluefni með öðrum leiðum. Fram hefur komið að Kári og Þórólfur Guðnason sóttvarnalæknir hafi fundað með Pfizer með það fyrir augum að tryggja allri þjóðinni bóluefni í gegnum rannsóknarverkefni.

Uppfært klukkan 12:43:

Eftirfarandi tilkynning barst frá heilbrigðisráðuneytinu nú eftir hádegi „í ljósi umræðu síðustu daga um samninga um bóluefni og afhendingu efnanna.“ 

Það er styrkur Íslands að hafa átt þess kost að vera með í breiðu og öflugu samstarfi Evrópuþjóða um samninga og kaup á bóluefni. Við höfum þegar tryggt okkur með þeim samningum bóluefni sem er mun meira en við þurfum á að halda. Ísland er samferða Evrópusambandinu og hinum Norðurlöndum og reiknað er með því að stór hluti Íslendinga verði bólusettur fyrir sumarið.

Frá bóluefnaframleiðandanum Pfixer fær Ísland um 250.000 skammta sem duga fyrir um 125.000 einstaklinga. Fyrsta sending barst 28. desember og var 10.000 skammtar og fram í mars 2021 munu okkur berast að lágmarki 50.000 skammtar af bóluefni Pfizer.

Samningur Íslands við Moderna var undirritaður 30. desember. Mat Evrópsku lyfjastofnunarinnar (EMA) er forsenda markaðsleyfis og áætlað er EMA haldi matsfund vegna Moderna 6. janúar 2021 en til vara 12. janúar 2021. Ísland fær um 128.000 skammta sem duga fyrir um 64.000 einstaklinga og áætlað er að afhending hefjist á fyrsta ársfjórðungi.

Ísland fær einnig um 230.000 skammta sem duga fyrir um 115.000 einstaklinga af bóluefni frá Aztra Zeneca og fyrirtækið stefnir að því að byrja að afhenda skammta í Evrópu á fyrsta ársfjórðungi.

Ísland fær bóluefni fyrir 235.000 einstaklinga frá Janssen og áætlað að byrja afhendingu á þriðja ársfjórðungi.

Upplýsingar um fjölda skammta frá fyrirtækjunum Sanofi og Curavac liggja ekki fyrir.