Ís­lenska Cross­Fit fólkið kemst ekki lengur á heims­leikana í gegnum „The Open“

Sara Sigmundsdóttir, Anníe Mist Þórisdóttir, Björgvin Karl Guðmundsson og Katrín Tanja Davíðsdóttir tryggðu sér öll sæti á heimsleikunum í ár í gegnum The Open en ekkert þeirra getur endurtekið leikinn á árinu 2021.

CrossFit tímabilið 2020 var ólíkt öllum öðrum og næsta tímabil mun einnig bjóða upp á heilmiklar breytingar og þá helst í sambandi við það hvernig CrossFit fólk út um allan heim tryggir sér sæti á heimsleikunum 2021.

Í gær voru hundrað dagar í það að „The Open“ byrjar en það markar upphaf nýs keppnistímabilsins í CrossFit.

Mourning Chalk Up vefurinn nýtti þau tímamót til að fara yfir hvað er vitað um hvernig 2021 CrossFit tímabilið mun líta út. Það var þegar vitað að nýr eigandi, Eric Roza, hefur unnið markvisst að því með CrossFit fjölskyldunni að endurskipuleggja fyrirkomulag CrossFit tímabilsins.

Justin LoFranco hjá Mourning Chalk Up hefur ásamt sínu fólki grafið upp ýmsar upplýsingar um hvernig komandi CrossFit tímabil muni líta út en hann tók það reyndar fram í grein sinni að ekkert af þessu sé enn meitlað í stein. Það er því enn von á einhverjum breytingum.

Það eina sem er alveg öryggt er að „The Open“ mun byrja 18. febrúar 2021 og keppnistímabilið hefst því eftir 99 daga.

Stór breyting verður á því hvernig fólk tryggir sér sæti á heimsleikunum.

Eins og staðan er núna mun „The Open“ ekki lengur gefa sæti á heimsleikunum. Undanfarin ár hafa tuttugu efstu á „The Open“ unnið sér sæti á heimsleikunum í gegnum opna nethlutann og fyrir innrás kórónuveirunnar þá tryggðu einnig efsti karl og efsta kona í hverju landi sér sæti á leikunum með árangri sínum í opna hlutanum.

Nú þurfa keppendur að vinna sér þátttökurétt á heimsleikunum með árangri sínu á einu af viðurkenndu CrossFit mótunum sem verða í boði eftir að „The Open“ klárast.

Undanfarin ár hafa sigurvegarar þessa CrossFit móta tryggt sér farseðla á leikana en nú má búast við því að mun fleiri sæti verði í boði á hverju móti fyrir sig.

Það verða hins vegar strangari reglum um þátttöku á umræddum CrossFit mótum. Það er búist við því að evrópskir keppendur þurfi að tryggja sig inn á heimsleikana í gegnum mót á þeirra svæði en geti ekki flakkað um heiminn til þess.

Íslenska CrossFit fólkið hefur tekið þátt í slíkum CrossFit mótum víða um heiminn en þurfa líklega að halda sig í Evrópu á næsta ári.

Það er búist við að það fari fram tólf viðurkennd CrossFit mót þar sem barist verður um sæti á heimsleikana. Þau munu væntanlega skiptast þannig niður eftir heimshlutum: Norður Ameríka (5 mót), Evrópa (3 mót), Ástralía (1 mót), Asía (1 mót), Afríka (1 mót) og Suður Ameríka (1 mót). Fjöldi móta á hverju svæði tekur mið af því hversu margir þátttakendur á hverju svæði tóku þátt í „The Open“ undanfarin ár.

Það er líka góður möguleiki á því að það verði síðan sett upp sérstök mót í lokin fyrir þá keppendur sem hafa þá enn ekki tryggt sér sæti á heimsleikunum.

Þegar kemur að því hversu mörg sæti verða í boði á hverju svæði þá er líklegast að hvert mót bjóði upp á þrjú til fimm sæti. Það sem Mourning Chalk Up hópurinn hefur heyrt er að það verði 25 sæti í boði fyrir Norður Ameríku (5 sæti í boði á hverju móti), 15 fyrir Evrópu, 3 fyrir Ástralíu, 3 fyrir Suður Ameríku, eitt fyrir Afríku og eitt fyrir Asíu.