Þetta er á­kveðin reynsla sem við setjum í bak­pokann

Arnar Þór Viðarsson var aðalþjálfari íslenska landsliðsins er liðið tapaði 2-1 fyrir Belgíu í Þjóðadeildinni í kvöld. Arnar Þór var með U21 árs landsliði Íslands í gær er liðið vann 2-0 sigur á Lúxemborg ytra. Við tók ótrúlegt ferðalag til Íslands þar sem allt starfslið Íslands er í sóttkví eftir að smit kom upp hjá starfsmanni þess.

Arnar Þór var nokkuð sáttur með frammistöðu kvöldsins gegn liðinu sem trónir á toppi heimslista FIFA. Hann hefði þó viljað sjá liðið jafna metin undir lok leiks.

„Megum vera stoltir af strákunum og þeir mega vera stoltir af sjálfum sér. Seinni hálfleikurinn var bara að mínu mati mjög góður. Á köflum fínt spil. Náðum að halda boltanum, auðvitað vorum við 2-1 undir en það er ekkert sjálfgefið að halda boltanum á móti þessu liði. Varnarleikurinn var mjög góður í seinni hálfleik. Náðum að loka aðeins betur á þá en í fyrri hálfleiknum. Yfir heildina litið var þetta ágætt en við hefðum gjarnan viljað ná að jafna þarna í lokin,“ sagði Arnar Þór um sinn fyrsta leik sem þjálfari íslenska A-landsliðsins.

„Nei nei, við vitum náttúrulega að þetta belgíska lið er með mörk í öllum stöðum. Þegar þú ert með svona framherja og boltinn lendir á réttum stað eða við náum ekki að hreinsa þá er það hættulegt. Þú verður bara að halda áfram og það þýðir ekkert að henda leikskipulaginu út um gluggann. Ég held að þjálfararnir okkar hafi sett leikinn mjög vel upp, það var mín og Davíð Snorra [Jónassyni] og Dodda [Þórði Þórðarsyni] að fylgja því skipulagi og ég held það hafi verið mjög vel gert,“ sagði Arnar er Henry Birgir Gunnarsson spurði hvort það hefði farið um hann er Romelu Lukaku kom Belgum yfir strax á 9. mínútu leiksins.

„Ég er bara ekki búinn að sjá þetta. Sá að Sverrir Ingi [Ingason] fór niður í tæklingu inn í teig og veit ekkert hvort það var einhver snerting eða ekki. Það er svona ákveðin regla – eins og ég segi þá er ég ekki búinn að sjá þetta – ef þú getur staðið í lappirnar þarna áttu að standa í lappirnar en ég þarf að sjá þetta aftur,“ sagði Arnar.

Það er ljóst að Arnar var ekki með besta sjónarhornið en það var Hólmar Örn Eyjólfsson sem fékk á sig dæmda vítaspyrnu en ekki Sverrir Ingi.

„Staðan er ágæt en maður er ekkert búinn að sofa mikið. Ég náði ekki að fagna sigrinum í gær með U21 árs liðinu og það var eiginlega strax farið í það að plana eitthvað ævintýri. Þegar KSÍ ákvað að kalla mig heim og þetta væri möguleiki þá var það alltaf ánægjulegt fyrir mig. Þetta er ekki aðeins fyrir mig heldur líka fyrir Davíð Snorra og Dodda að taka þátt í svona verkefni er svolítið annað heldur en yngri landsliðin. Þetta er ákveðin reynsla sem við setjum í bakpokann og við erum þakklátir fyrir sóttkví starfsfólksins þó það sé það ekki,“ sagði Arnar um stöðuna á sér eftir þennan ævintýralega sólahring hjá sér.

„Þau gengu bara fínt. Ég kom bara í morgun og Freyr [Alexandersson] og Erik [Hamrén] voru búnir að stilla leiknum upp með Davíð Snorra og Dodda. Svo vorum við bara í sambandi við það. Þeir lögðu leikinn upp og þeir héldu leiknum gangandi úr boxinu uppi, allar þær skiptingar og það sem gerist er þeirra. Við erum bara á línunni til að hjálpa,“ sagði Arnar Þór að lokum.