Umfjöllun og viðtöl: HK - KR 1-1 | Tak HK á KR heldur áfram

Seinasti leikur liðanna fyrir landsleikjahlé fór fram í Kórnum í dag. Seinast þegar KR mætti í Kórinn tapaði liðið 4-1 en endaði sem Íslandsmeistarar það ár.

Gangur leiksins.

Leikurinn fór rólega af stað til að byrja með, KR hélt boltanum meira og reyndu að ógna marki HK en það var oft með tíðindarlitlum skotum sem Arnar sá við þegar á þurfti.

KR komst yfir tæpan 25 mínútna leik þegar Kennie Chopart sendir langann bolta sem Óskar Örn skallar beint í svæði þar sem Atli Sigurjónsson mætti í og sá að Arnar Freyr var kominn langt úr markinu og vippaði hann yfir hann.

HK svöruðu marki KR ágætlega og fékk Bjarni Gunnarsson besta færi heimamanna þegar Atli Arnarsson lyfti boltanum á hann inn í teignum en skot Bjarna fór rétt framhjá markinu.

Ægir Jarl fékk gott tækifæri undir lok fyrri hálfleiks til að koma KR í tveggja marka forrystu þegar Arnar Freyr kýldi skot Atla beint út í teiginn þar sem Ægir Jarl var mættur en Arnar mætti vel á móti honum og lokaði markinu.

Seinni hálfleikurinn byrjaði með sama sniði og sá fyrri það var lítið um ógnanir á báðum endum vallarinns. Ekki mátti miklu muna að langskot Atla Sigurjónssonar endaði inni en það hafnaði í þverslánni.

Bjarni Gunnarsson fékk síðan dauðafæri til að jafna leikinn þegar Hörður sendi lágan bolta inn í teiginn sem fór beint á hann en skot Bjarna fór í slánna.

Ásgeir Marteinsson kom inná sem varamaður í hálfleik og jafnaði metin þegar tæpar tvær mínútur voru eftir af venjulegum leiktíma. Langur bolti fram völlinn sem Stefán skallar beint í teiginn þar er Ásgeir mættur og skoraði laglegt mark.

Ekki mátti miklu muna að HK myndi stela öllum stigunum í dag þegar liðið fékk tvö færi alveg í blálokinn en jafntefli sanngjörn niðurstaða.

Af hverju jafntefli?

Þetta var leikur tveggja hálfleika, KR voru með öll völd á fyrri hálfleik og fengu færi til að skora fleiri en eitt mark á meðan HK var betri aðilinn í seinni hálfleik og voru færi HK hættulegri sem þeir hefðu getað nýtt betur.

Hverjir stóðu upp úr?

Atli Sigurjónsson var langbesti leikmaður KR í dag flest öll færi sem KR fengu var hann í boltanum annað hvort að skapa þau fyrir liðsfélaga sína eða sjálfan sig sem skilaði honum einu laglegu marki.

HK gerði þrjár skiptingar í leiknum og áttu allir varamenn HK góðan leik. Ólafur Eyjólfsson var frábær á miðjunni hann stýrði spilinu vel og var duglegur að koma boltanum út á kantana, Ásgeir Marteinsson kom inná í hálfleik hann kom vel inn í leikinn og gerði jöfnunarmark leiksins sem Stefán Ljubicic þriðja skipting HK lagði upp á hann.

Hvað gekk illa?

Varnarleikur HK í marki KR var ekki til útflutnings, Leifur lét Óskar fá frían skalla sem hann flikkaði í svæði sem Atli Sigurjónsson mætti í sem sá að Arnar Freyr var mættur alltof framarlega.

Það vantaði meiri gæði í síðasta þriðjung KR til að koma inn öðru marki sem hefði farið með leikinn, Ægir Jarl var ekki að finna sig í leiknum í dag og söknuðu KR ingar þjónustu Kristján Flóka í dag.

Hvað er framundan?

Landsleikjahlé er næst á dagskrá því er pása á deildinni fram að 15 október þegar heil umferð verður spiluð. Kópavogsslagur fer fram á Kópavogsvelli þegar HK mætir Blikum klukkan 19:15. Á sama tíma fer KR inn í Egilshöllina og mætir Fjölni.

Brynjar Björn: Vorum slakir í fyrri hálfleik.

„Frammistaða liðsins var góð í seinni hálfleik við vorum ósáttir með fyrri hálfleikinn þar sem við vorum flatir það var lítið að gerast og nýttum við ekki tækifærin og urðum flatir með leiknum. Við þurftum bara gera betur á öllum sviðum í hálfleik vera mættir í svæðin,” sagði Brynjar Björn og var ánægður með að liðinu tóks þó að brjóta þétta vörn KR.

Markið sem KR skoraði leit mjög klaufalega út þar sem þeir splundra vörn HK og Arnar Freyr mættur lengst út á móti en ekki nægilega langt út til að loka á skot Atla.

„Við vinnum ekki fyrsta boltann og töpum seinni boltanum, mjög einfalt, við unnum ekki okkar návígi sem við þurfum að fara gera oftar og betur,” sagði Brynjar sem fannst mark KR ekki vera röð mistaka hjá sínu liði.

„Við fengum þokkaleg færi sérstaklega síðustu fimm mínúturnar, það var erfitt að brjóta þétta vörn KR við gerðum vel í að koma upp völlinn en hefðum átt að gera betur á síðasta þriðjung vallarins, Stefán kom inná sem gefur okkur öðruvísi vídd sóknarlega og skorum við mark sem var mjög líkt marki KR,” sagði Brynjar um sóknarleik liðsins

HK hefur ekki haldið marki sínu hreinu síðan undir lok ágúst mánaðar þegar liðið mætti Gróttu á heimavelli.

„Ég hef bara ekkert pælt í því svo einfalt er það, auðvitað myndi ég vilja halda oftar hreinu en við reynum alltaf að spila góða vörn og pæli ég lítið hvenær við munum næst halda hreinu en það er rétt að heilt yfir höfum við fengið á okkur of mikið af mörkum.”