Slíðruðu sverðin í dómsal eftir sérstaklega hættulega líkamsárás

Sautján ára drengur var í dag dæmdur í tíu mánaða skilorðsbundið fangelsi í héraðsdómi Reykjavíkur fyrir sérstaklega hættulega líkamsárás. Drengurinn stakk jafnaldra sinn eftir átök hverfahópa í Breiðholti í apríl á þessu ári.

Árásin átti sér stað síðdegis fimmtudaginn 23. apríl. Árásarmaðurinn stakk brotaþola með hníf í vinstri öxl og hægra megin í brjóstkassa með þeim afleiðingum að hann hlaut skurði og lífshættulega áverka á lifur með blæðingu í kvið.

Bæði árásarmaðurinn og brotaþoli eru sautján ára gamlir og voru þeir elstir af þeim sem tóku þátt í átökunum. Við meðferð málsins í héraði eru drengirnir þó sagðir hafa rætt saman og „slíðrað sverðin“ svo hvorki kæmi til frekari átaka milli þeirra né hópanna.

Hamar, hnífur og hasskaup

Að sögn ákærða hafði hann farið upp í Breiðholt til þess að kaupa hass ásamt öðrum drengjum. Í kjölfarið hafi brotaþoli komið á vespu og ráðist á hann ásamt öðrum dreng með hamri. Þá hafi ákærði tekið upp hníf til þess að verja sig.

Hann kvaðst áður hafa orðið fyrir árás af hálfu brotaþola og þess vegna haft hníf meðferðis. Einhver illindi hafi verið á milli þeirra eftir að brotaþoli hafi beðið ákærða um símanúmer sem hann neitaði að gefa upp.

Brotaþoli hafnaði því að hamar hefði komið við sögu og sagðist ekki hafa haft vopn meðferðis. Hann þekkti vissulega til árásarmannsins og þeir hefðu átt í deilum sín á milli, en engar líkamsárásir hefðu átt sér stað fyrr en þarna. Þá sagði hann ákærða hafa átt frumkvæðið að árásinni þegar hann reyndi tilefnislaust að stinga hnífnum í hálsinn á sér.

Mikill fjöldi fólks var á vettvangi þegar lögreglu bar að garði eftir árásina. Þar á meðal var móðir drengsins sem hafði verið stunginn og hélt hún handklæði að kvið hans þar sem hann hafði verið stunginn. Drengurinn var fluttur með sjúkrabifreið á slysadeild.

Handtekinn næsta dag 

Fjölmörg vitni lýstu atburðarásinni og sögðust hafa séð hóp drengja í átökum. Félagsmiðstöðvarstarfsmaður í hverfinu varð vitni að árásinni eftir að hann heyrði öskur og leit út. Þar hafi hann séð nokkra drengi í slagsmálum og einn þeirra hafi veist að öðrum með felgujárni eða harmi. Hann kannaðist þó ekki við þá sem tóku þátt í slagsmálunum en gerði lögreglu viðvart.

Hjón sem keyrðu nærri vettvangi höfðu séð tvo drengi koma á vespu á miklum hraða inn á bílastæði. Ljóst væri að um tvo drengjahópa væri að ræða, hávær köll hafi borist frá þeim og mikil heift í samskiptunum. Einnig sáu þau dreng halda á hamri og sagði konan að um klaufhamar væri að ræða.

Lögreglumaður sem gaf skýrslu fyrir dómi sagði lögreglu hafa lýst eftir drengnum eftir árásina. Hann hafi verið handtekinn næsta dag en rannsókn hafi leitt í ljós að árásina mætti rekja til átaka milli þessara hópa.

Við meðferð málsins var litið til þess að ákærði er fæddur árið 2003 og hafði ekki áður gerst sekur um refsiverða háttsemi. Árásin hafi þó verið sérstaklega hættuleg en ekki þótti unnt að slá því föstu að árásarmanninum hafi verið ljóst að líklegt væri að brotaþoli myndi hljóta bana af stungunni.