Segir lífið hafa verið „smá ruslagám“ eftir skilnaðinn

Söngkonan Kelly Clarkson segir ekkert launungarmál að það sé erfitt að skilja. Clarkson sótti um skilnað frá eiginmanni sínum Brandon Blackstock í júní eftir sjö ára hjónaband og eiga þau tvö börn saman.

„Þetta hefur verið svolítið erfitt fyrir mig persónulega undanfarna mánuði,“ sagði Clarkson í viðtali við Sundway Today with Willie Geist. Hún sagði líf sitt hafa verið „smá ruslagám“ frá því að hún sótti um skilnaðinn, enda sé það eitt það versta sem fólk lendir í.

„Ég hef verið að tala við vini sem hafa gengið í gegnum skilnað. Ég veit ekki hvernig fólk kemst í gegnum það án þess að hafa einhvern til þess að leita til.“

Tæplega mánuði eftir að hún sótti um skilnað fór Emmy-verðlaunahátíðin fram þar sem hún vann sín fyrstu Emmy-verðlaun fyrir „framúrskarandi spjallþáttastjórnanda“. Vegna anna í einkalífinu hafði hún hreinlega gleymt því að hátíðin væri að eiga sér stað og vissi ekki af verðlaununum fyrr en framleiðandinn hennar lét hana vita að hún hafði unnið.

„Ég var að eiga erfiða viku og ég byrjaði nánast að gráta,“ sagði Clarkson.