Sér­sveit og lög­regla kölluð til vegna vopnaðs manns

Karlmaður á þrítugsaldri var handtekinn á sjöunda tímanum í kvöld eftir umfangsmiklar aðgerðir lögreglunnar á höfuðborgarsvæðinu og sérsveitar ríkislögreglustjóra. Maðurinn hafði ógnað pari með eggvopni við Skarðshlíðarskóla í Hafnarfirði.

Tilkynning um málið barst lögreglu rétt fyrir klukkan fimm í dag. Þegar lögregla mætti á vettvang var nærliggjandi götum lokað á meðan leitað var að manninum, en mikill viðbúnaður var vegna málsins. 

Hann fannst síðar í nærliggjandi húsi.

Í tilkynningu frá lögreglu segir að engan hafi sakað, þó parinu hafi „eðlilega verið mjög brugðið“ vegna atviksins.