Öll spjót standa á Róbert Spanó

Jón Steinar Gunnlaugsson lögmaður og Illugi Jökulsson rithöfundur hafa löngum verið á öndverðum meiði í hverju sem helst en þeir eru hjartanlega sammála um að það hafi verið vítavert af Róberti Spanó forseta Mannréttindadómsstólsins að þiggja sérstaka heiðursnafnbót við háskólann í Istanbúl í Tyrklandi. Þannig standa nú spjót á Spanó.

Vísir fjallaði ítarlega um málið í gær en þar var greint frá gagnrýni Ingibjargar Sólrúnar Gísladóttur, fyrrverandi forstjóri Lýðræðis- og mannréttindastofnunar ÖSE, sem sagði heimsókn Róberts Spanó til Tyrklands vera dapurlega. Róbert, sem er forseti Mannréttindadómstóls Evrópu, fór til Tyrklands í fjögurra daga heimsókn í vikunni sem leið. Róberti ætti að vita manna best að mannréttindi eiga verulega undir högg að sækja í Tyrklandi.

„Óvíða eru jafn margir blaðamenn á bak við lás og slá og fjöldinn allur af dómurum og háskólakennurum hafa verið reknir og sóttir til saka á þeirri forsendu að þeir séu hliðhollir hryðjuverkamönnum,“ segir Ingibjörg.

Dómgreindarleysi að þiggja fjólur Erdogans

Vísir reyndi að fá viðbrögð hjá Róbert Spanó í gær vegna málsins en hann vildi ekki veita viðtal. En nokkur fjöldi manna hafa stigið fram og ýmist furðað sig á eða fordæmt Róbert fyrir að þiggja þessa tyrknesku vegtyllu en þeir telja víst að Erdagon muni notfæra sér þetta sem einskonar viðurkenningu af hálfu Mannréttindadómstólsins á yfirvöldum þar í landi.

Jón Steinar ritar grein á vefsvæði sitt þar sem hann gerir málið að umtalsefni. Segir þetta vond tíðindi að dómarinn skuli þiggja „svona fjólur af ríki sem allir vita að reglulega forsmáir vernd mannréttinda og hefur þurft að verjast fjölmörgum kærum fyrir MDE undanfarin misseri, m.a. fyrir brot á tjáningarfrelsi borgara sinna.“

Hvað heldur Róbert að Tyrkjum gangi til?

Jón Steinar telur að dómarar við MDE eigi ekki að þiggja svona viðurkenningar frá aðildarríkjunum. Ríkin eru aðilar til varnar í kærumálum sem berast til dómstólsins.

„Það er því ekki við hæfi að dómarar taki við atlotum þeirra. Slíkt hlýtur að rýra traust manna til dómstólsins,“ segir Jón Steinar og spyr hvers vegna Róbert Spanó haldi að Tyrkir hafi viljað hengja á hann orðu?

„Dettur honum ekki í hug að það kunni að vera vegna viljans til að gera hann vinveittan þeim stjórnvöldum í þessu landi, sem sífellt þurfa að verja hendur sínar fyrir dómstólnum?“

Lögmaðurinn segir forsmán ef dómarar við dómstólinn séu svo hégómlegir að vilja þiggja svona viðurkenningar fremur en að afþakka þær í þágu þeirra hagsmuna sem þeim hefur verið trúað fyrir að gæta í þágu almennra borgara í aðildarríkjum að dómstólnum. „Það er sorglegt að íslenski dómarinn við dómstólinn skuli falla á kaf í þennan pytt. Vonandi drukknar hann ekki.“

Hart að þurfa að efast um dómgreind dómarans

Illugi Jökulsson er hjartanlega sammála Jóni Steinari í þessum efnum.

„Framganga Róberts Spanó í Tyrklandi eru skelfileg og óskiljanleg vonbrigði. Það er með hreinum ólíkindum að hann hafi látið sér detta í hug að það væri í lagi að taka við heiðursdoktorsnafnbót þarna, og raunar var ekki mikið skárra en að láta yfirleitt mynda sig með Erdogan,“ segir Illugi á Facebook-síðu sinni.

Illugi gefur lítið fyrir þá röksemd sem fram hefur komið að ræða eigi kurteislega við einræðisherra sem fótumtroða mannréttindi. Slíkt sé einskis virði „slíkir herrar taka ekkert mark á þessháttar viðræðum og forherðast bara yfir því að vera yfirleitt taldir viðræðuhæfir. Það er helvíti hart að þurfa nú að efast um dómgreind dómarans, tala nú ekki um æðsta dómara við mannréttindadómstól Evrópu.“

Kanter segir að Spanó eigi að segja af sér

Illugi tengir við grein Skúla Magnússonar, héraðsdómara og fyrrverandi formanni Dómarafélags Íslands, sem hann birti á Vísi í morgun og hefur vakið mikla athygli. „Ég er sammála Skúla Magnússyni hér.“

Þannig eru þeir úr ýmsum áttum, sem hafa eldað grátt silfur á öðrum vígstöðvum, orðnir samherjar í þessu máli. Reyndar eru þeir sem vilja fordæma þessa Tyrklandsheimsókn Róberts Spanó síður en svo bundin við Ísland. Fjöldinn allur af fólki sem hefur þungar áhyggjur af stöðu mála í Tyrklandi telur þetta alveg galið hjá dómaranum. Þannig lætur Enes Kanter, körfuboltakappi sem leikur með Boston Celtics í NBA-deildinni, fá það óþvegið á Twittersíðu sinni.

DV greinir frá þessu fyrr í dag en Enes Kanter er af tyrkneskum ættum og hann telur að Róbert Spanó ætti að segja af sér vegna málsins. Enginn ætti að lúta einræðisherra á borð við Erdogan, segir Kanter.