Langþráðir boltavellir við Vesturbæjarskóla

Nýir boltavellir og leiksvæði með trampólínum og pókóvöllum koma við Vesturbæjarskóla í sumar. Kostnaðaráætlun hljómar upp á 90 milljónir króna. Borgarráð hefur heimilað umhverfis- og skipulagssviði að bjóða út framkvæmdir við annan áfanga vegna endurgerðar og stækkunar lóðar við Vesturbæjarskóla. Þetta kemur fram í tilkynningu frá Reykjavíkurborg.

Áður hafa farið fram gagngerar endurbætur á skólalóðinni þegar áfangi eitt var framkvæmdur í fyrrasumar. Í þeim áfanga var gengið frá lóð við nýja viðbyggingu skólans, ný leiktæki og rólur sett upp, auk yfirbyggðs hjólaskýlis og vistlegra útivistarpalla úr tré. Þá var hellulögn endurnýjuð í kringum skólann.

Í öðrum áfanga verður lóðin stækkuð í samræmi við samþykkt deiliskipulag og komið fyrir nýrri gönguleið á milli Hringbrautar og Ásvallagötu.

Gerðir verða nýir boltavellir og leiksvæði á gervigrasi, ný hvíldar- og útikennslusvæði ásamt pókó- og trampólíngörðum. Einnig verður komið fyrir setbekkjum, leikpöllum og nýjum gróðurbeðum á lóðinni.

Í tilkynningu frá Reykjavíkurborg er þess getið að enginn fótboltavöllur með gervigrasi sé í þessum hluta Vesturbæjar, norðan Hringbrautar.