Stefán: Þegar að Gústi klárar lagið, þá er frábært að hlusta á hann

Stefán Arnarson, þjálfari Fram, var eðlilega sáttur eftir fjögurra marka sigur Fram á Val í uppgjöri toppliðanna í Olís deild kvenna. Lauk leiknum með 28-24 sigri Safamýrastúlkna sem eru nú komnar með níu fingur á deildarmeistaratitilinn.

„Ég er bara ótrúlega ánægður. Okkar markmið er að vinna þessa deild, það er markmið númer eitt og nú þurfum við eitt stig í næstu þrem leikjum þannig að ég er mjög ánægður að vera kominn í þessa stöðu,“ sagði Stefán brattur eftir sigurinn í dag.

Stefán talaði svo um hvað það var sem að skóp þennan sigur í dag.

„Við spiluðum heilt yfir mjög vel, góður varnarleikur hjá okkur og markvarslan kom þegar fór að líða á leikinn. Sóknarleikurinn var bara vel upp settur og ég er bara virkilega ánægður með þennan leik hjá okkur á móti mjög sterku Valsliði.“

Stefán var ekki alveg sammála Ágústi um að deildarmeistaratitillinn væri í höfn.

„Við erum komin í góða stöðu en eins og Gústi veit, því að Gústi er góður söngvari, þá verður hann að klára lagið. Þegar að Gústi klárar lagið, þá er frábært að hlusta á hann og ég vona að okkur takist að klára þetta,“ sagði Stefán léttur.