Norðan hríð er nú á Norðurlandi og Vestfjörðum og hefur Veðurstofan gefið út gular viðvaranir í gildi í Breiðafirði, Vestfjörðum, Ströndum og Norðurlandi vestra og Norðurlandi eystra.
Hægari vindur er í öðrum landshlutum, en í dag mun hvessa vestanlands og á Austurlandi með éljagangi. Frost verður á bilinu 0 til 4 stig, en heldur hlýnandi er líður á daginn.
„Í nótt og á morgun dregur síðan úr vindi og úrkomu á landinu og annað kvöld verður vindur víðast hvar á bilinu 3-10 m/s, léttskýjað sunnantil en ennþá stöku él um landið norðanvert. Útlit er fyrir hæga norðlæga átt á miðvikudag og fimmtudag með bjartviðri og talsverðu frosti,“ segir í hugleiðingum veðurfræðings.
Vetrarfærð í öllum landshlutum
Vetrarfærð er í öllum landshlutum og éljagangur eða snjókoma á Vestfjörðum og í Norðurlandi. Á vef Vegagerðarinnar kemur fram að á víða sé þæfingsfærð á Vestfjörðum eða þungfært og stórhríð. Ófært er á Þröskuldum og Klettshálsi og beðið með mokstur vegna veðurs.
Á Norðurlandi er hálka, snjóþekja eða þæfingsfærð á vegum. Ófært er á Þverárfjalli en unnið að hreinsun. Víkurskarð er einnig ófært og beðið með mokstur vegna veðurs.
Óvissustig vegna snjóflóðahættu er í gildi við Súðavíkurhlíð og Ólafsfjarðarmúla.
Veðurhorfur á landinu næstu daga
Á þriðjudag: Norðan og norðaustan 8-15 m/s og él fyrir norðan, en þurrt syðra. Dregur heldur úr vindi og éljum þegar kemur fram á daginn. Frost 0 til 5 stig.
Á miðvikudag: Norðaustan 8-13 m/s NV-til og við SA-ströndina, en annars hægari. Lítilsháttar él við N-ströndina, él eða snjókoma við S-ströndina, en annarsbjart með köflum og þurrt að kalla. Frost 1 til 10 stig, mest í innsveitum N-lands.
Á fimmtudag: N-læg eða breytileg átt, 3-10 m/s. Stöku él með norðurströndinni en annars léttskýjað. Frost 3 til 13 stig, kaldast N-til.
Á föstudag: Austan stormur með snjókomu eða slyddu, en rigningu syðst um kvöldið. Hiti um eða yfir frostmarki S-til, en vægt frost N-lands.
Á laugardag: Suðaustlæg átt og rigning eða slydda með köflum S-lands, annars að mestu bjart. Hvessir og bætir í úrkomu S- og A-til um kvöldið. Vægt frost, en hiti 0 til 3 stig syðst.
Á sunnudag: Útlit fyrir norðaustlæga átt með snjókomu eða slyddu NA-til, en annars skýjað. Hægt kólnandi.
