Straumar og stefnur atvinnulífsins 2020: Fimm helstu atriðin

Atvinnulífið gengur í gegnum strauma og stefnur eins og allt annað. Þau atriði sem talin eru verða mest áberandi árið 2020 eru flest orðin sýnileg á Íslandi nú þegar. Það að hagnaður sé ekki lengur það eina sem skiptir máli er eitthvað sem við heyrum æ oftar. Að kynjahlutföll skipti meira máli í ráðningum eða að fyrirtæki leggi aukna áherslu á sjálfbærni. 

Hér eru þau fimm atriði sem eru talin verða mest áberandi í straumum og stefnu atvinnulífsins 2020.

1. Fleira en hagnaður skiptir máli.

Við erum aðeins farin að finna nasaþefinn af þessari umræðu. Sumir hafa sett þetta í samhengi við loftlagsmálin, aðrir kynjahlutföll innan fyrirtækja og fleira mætti telja.

Í könnun sem Fortune gerði árið 2019 svöruðu 72% aðspurðra að þeir teldu fyrirtæki eiga að stýrast af fleiri þáttum en eingöngu rekstrarniðurstöðu. 64% sögðust telja að hagnaður og markmið um samfélagslega ábyrgð ættu hvoru tveggja að vera meginmarkmið reksturs.

2.  Heilsueflandi vinnustaðir.

Kulnun hefur víða verið áberandi í umræðunni og það ekki aðeins á Íslandi. Forbes er einn fjölmargra erlendra miðla sem hefur fjallað um mikilvægi heilsueflandi vinnustaða og segir þetta markmið eiga vera ofarlega á verkefnalista hvers fyrirtækis árið 2020.

Forbes vísar m.a. til rannsóknar sem gerð var í Bandaríkjunum í fyrra þar sem niðurstöður sýndu að um helmingur aldamótakynslóðarinnar færðu sig til á milli vinnustaða vegna álags og heilsubrests. Aldamótakynslóðin eru einstaklingar sem fæddir eru á níunda og tíunda áratugnum. Sömu niðurstöður fyrir Z kynslóðina sýndu hlutfallið 75% en Z kynslóðin vísar til fólks sem fætt er 1996 eða síðar.

3.  Stafrænni veröld býður upp á meiri sveigjanleika og fjarvinnu fyrir fleiri.

Fjarvinna var eitthvað sem fór að komast í umræðuna upp úr aldamótum. Í kjölfar netsins gátum við orðið sítengd. Smátt og smátt fjölgar störfum þar sem fjarvinna verður valkostur og fyrir vikið fara fleiri fyrirtæki að bjóða upp á fjarvinnu sem valkost. 

Þessi þróun er sögð líkleg til að opna ný tækifæri fyrir fólk sem til dæmis glímir við fötlun og hefur fyrir vikið átt erfitt með að taka þátt á almennum vinnumarkaði en gæti gert það í fjarvinnu. Þá getur þetta skapað atvinnutækifæri fyrir fólk sem býr fjarri þéttbýliskjörnum.

4. Að gera EKKERT verður vinsælt.

Þegar kemur að því innra með okkur er því spáð að næst á eftir núvitund og hugleiðslu sem hafa verið vinsæl síðustu árin, komi nú markmiðið um að gera EKKERT.  Það sé þá hluti af því að efla okkur í starfi og hverju öðru sem við fáumst við. Að stara út um gluggann í smá stund er til dæmis sagt geta okkur við einbeitingu og fókus þegar við höldum áfram að vinna. Að dagdreyma er sagt efla sköpunargleðina.

,,Niksen“ er dæmi um bylgju sem gengur út á að kenna fólki að gera ekkert og New York Times hefur meðal annarra fjallað um.

5.  Fæðingarorlof foreldra.

Í réttindamálum er sagt að umræðan um fæðingarorlof foreldra verði mest áberandi.  Víða erlendis er staðan þó önnur en hér og í Bandaríkjunum felst umræðan því helst í rétti feðra til að taka orlof.  Á Íslandi má gera ráð fyrir umræðu um þessi mál líka þar sem fyrirliggur frumvarp á Alþingi um lenginu fæðingarorlofs.  Þar er gert ráð fyrir að samanlagður réttur foreldra til fæðingarorlofs verði lengdur úr níu mánuðm í tólf mánuði og að lengingin komi til framkvæmda í tveimur áföngum á árunum 2020 og 2021.