Lægð gengur á land og gular viðvaranir

Lægð er nú suður af landinu og mun hún ganga yfir landið í dag. Þegar gætir úrkomu víða á landinu, ýmist rigningar eða snjókomu. Gular viðvaranir Veðurstofu taka gildi fyrir austan síðdegis í dag.

Norðlæg átt er vestantil á landinu, 8-15 m/s, en annars staðar er austlæg átt, yfirleitt 5-10 m/s.

„Eftir hádegi verður lægðin komin norður fyrir landið og vindur orðinn vestanstæður, 10-15 m/s og éljagangur, en styttir upp austantil og gengur í vestan 15-23 m/s á Suðausturlandi og Austfjörðum. Lægir í kvöld þegar að vindur snýr sér til austurs og næsta lægð tekur að stýra veðrinu á landinu. Hvöss austanátt á morgun með rigningu eða slyddu en snýst svo í hvassa suðvestanátt síðdegis með talsverðum éljagangi og kólnandi veðri,“ segir í hugleiðingum veðurfræðings á vef Veðurstofu Íslands.

Eins og áður segir gera spár nú ráð fyrir að gular viðvaranir taki gildi á Austfjörðum og Suðausturlandi síðdegis í dag. Búist er við vestanhvassviðri eða -stormi, 15-23 m/s. Þá gætu staðbundnir vindstrengir eða hviður orðið allt að 35 m/s. Veðurstofan beinir því til ökumanna að þeir fari varlega og íbúar tryggi lausamuni utandyra.

Veðurhorfur á landinu næstu daga

Á þriðjudag:

Austan 10-18 m/s og slydda eða rigning, en norðaustan 18-23 m/s og snjókoma á Vestfjörðum. Hiti kringum frostmark, en að 6 stigum syðst. Snýst í vestan 15-23 síðdegis með éljagangi og frystir, en léttir til eystra.



Á miðvikudag:

Vestan 15-23 m/s og gengur á með éljum, en lengst af léttskýjað eystra. Frost 0 til 5 stig.



Á fimmtudag:

Suðvestanátt 15-23 m/s og él, en heldur hægair og léttskýjað austantil á landinu. Frost 2 til 8 stig.



Á föstudag:

Ákveðin suðlæg átt með rigningu, einkum sunnantil og hlýnandi veður.



Á laugardag:

Vestlæg átt og éljagangur, en úrkomulítið um landið austanvert. Kólnar í veðri.



Á sunnudag:

Norðlæg eða breytileg átt, úrkomulítið og kalt í veðri.