Sjúkratryggingar gera þjónustusamning við Ljósið

Sjúkratryggingar Íslands og Ljósið hafa gert þjónustusamning um endurhæfingarþjónustu við fólk sem hefur greinst með krabbamein. Samningurinn tók gildi 1. janúar síðastliðinn og gildir til ársloka 2023.

Í tilkynningu frá Stjórnarráði Íslands segir að Ljósið hafi í gegnum tíðina þurft að tryggja rekstur sinn frá ári til árs með þjónustusamningum, gjöfum og söfnunarfé. Rekstrargrundvöllurinn hafi því aldrei verið fyrirsjáanlegur til lengri tíma með tilheyrandi óvissu fyrir rekstraraðila, starfsfólk og ekki síst notendur þjónustunnar.

Svandís Svavarsdóttir heilbrigðisráðherra hefur staðfest samninginn og segir hún það vera fagnaðarefni að mikilvæg þjónusta Ljóssins sé nú veitt á öruggum forsendum. Með þjónustusamningnum er rekstrarféð tryggt og þjónustan og umgjörðin skilgreind í heildstæðum samningi. Alls eru 220 milljónir króna tryggðar rekstri Ljóssins í fjárlögum þessa árs.

Ljósið var stofnað árið 2006 og er til húsa við Langholtsveg 43. Ljósið er viðurkennd heilbrigðisstofnun samkvæmt skilgreiningu laga og heyrir undir eftirlit Embættis landlæknis.

Ljósið sinnir endurhæfingu og veitir þeim sem hafa greinst með krabbamein og aðstandendum þeirra stuðning. Þjónustan felst meðal annars í iðjuþjálfun, sjúkraþjálfun, sálfræðiþjónustu, næringarráðgjöf og félagslegri virkni.