Fjölgun smita mikið áhyggjuefni

Svandís Svavarsdóttir heilbrigðisráðherra segir fjölgun kórónuveirusmitaðra hér á landi mikið áhyggjuefni. Hún segist áfram fara eftir ráðleggingum sóttvarnalæknis en segir áhrif hertra samkomutakmarkana, sem komið var á í síðustu viku, enn eiga eftir að koma í ljós. Hún segir það viðbúið að veiran verði viðvarandi hér á landi næstu mánuði og jafnvel lengur.

Fjöldi kórónuveirusmita hefur farið vaxandi síðustu daga. Í gær greindust sautján manns með veiruna innanlands. Í einangrun eru nú 109 og 904 eru í sóttkví.

„Aðgerðirnar sem við vorum að grípa til í síðustu viku, þær þurfa að sýna sig á tveimur vikum. Við þurfum að fá tíma til þess að sjá hvernig þær í raun og veru hafa áhrif. En þetta er áhyggjuefni, sannarlega, þessar tölur sem eru að koma upp núna. Að hluta til er þetta það sem sóttvarnalæknir nefndi fyrr og við höfum gert líka, að þetta gæti komið upp hópsmit sem við myndum þá reyna að einangra og greina í kringum þau. Ég geri ráð fyrir að það verði gert hratt og örugglega í framhaldi af þessu,“ sagði Svandís í samtali við fréttastofu að loknum ríkisstjórnarfundi í morgun.

Lítið að frétta í nýju minnisblaði

Svandís segir að í minnisblaði sem sóttvarnalæknir sendi ráðherra í gær og var síðan lagt fram á fundi ríkisstjórnarinnar í dag hafi verið að finna áherslur hans er snúa að skimun á landamærum.

„Þannig að það var í raun og veru bara árétting á því að við ættum að halda áfram okkar aðgerðum, að minnsta kosti út ágústmánuð og þá með aðkomu Íslenskrar erfðagreiningar til þess að taka við og hjálpa til með toppana. Þannig það var fyrst og fremst það sem kom þar fram og það minnisblað var lagt fram á ríkisstjórnarfundi,“ sagði Svandís.

Hún segir engar tillögur að breytingu á skimunarfyrirkomulagi á landamærunum hafa falist í minnisblaðinu.

Íslensk erfðagreining hjálpi til á annasömustu dögunum

Svandís segir að aðkoma Íslenskrar erfðagreiningar að skimun á landamærum sé unnin í samráði við Landspítala og sóttvarnalækni. Fyrirtækið hafi boðist til þess að hjálpa eins og þurfi.

„Þá erum við fyrst og fremst að tala um ákveðna kúfa, ákveðna toppa í ferðamönnum sem eru að koma til landsins á tilteknum dögum í águst. Það er háð samkomulagi frá degi til dags milli Landspítala, Íslenskrar erfðagreiningar og sóttvarnalæknis.“

Hvað varðar kostnað við aðkomu Íslenskrar erfðagreiningar að skimun segir Svandís hann ekki liggja fyrir í bili. Gögnum um það verði þó safnað saman og haldið til haga.

Ekki lengur einn skafl

Svandís segir að nú fari viðbrögðin við faraldrinum úr þeim fasa að um átaksverkefni sé að ræða.

„Stóra breytingin er það að við erum að fara úr þeim fasa að þetta sé átaksverkefni, að þetta sé einn skafl. Nú erum við í raun og veru að búa okkur undir það að við komum til með að lifa með veirunni enn um sinn. Að minnsta kosti í einhverja mánuði og mögulega einhver misseri. Þá þurfum við svolítið að endurstilla okkur öll í þá veru að við séum ekki bara að snúa bökum saman og klára þennan slag heldur miklu frekar þannig að við þurfum að finna út úr því hvernig samfélagið á að haldast gangandi sem allra best og sem allra öflugast, þrátt fyrir veiruna,“ sagði Svandís.

Í dag tilkynnti heilbrigðisráðuneytið að komið yrði á fót fimm manna verkefnateymi sem mun annast framkvæmd aðgerða vegna kórónuveirunnar út árið 2021.