Arnar líklegastur til að taka við þjálfarastarfinu hjá KA

Staða þjálfara hjá KA er laus eftir að Óli Stefán Flóventsson og KA komust að samkomulagi um starfslok. Samkvæmt heimildum Vísis er Arnar Grétarsson líklegastur til að taka við liði KA

Hann þjálfaði Breiðablik frá 2015-2017 og var hársbreidd frá því að vinna Íslandsmeistaratitilinn með liðinu árið 2015, en liðið endaði þá í öðru sæti, tveimur stigum á eftir Íslandsmeisturum FH. Hann var síðan rekinn frá Breiðablik árið 2017 eftir tvo tapleiki í byrjun tímabils. Arnar lék auðvitað lengi með Breiðabliks sem leikmaður og átti auk þess stutt stopp hjá Leiftri í efstu deild árið 1997 áður en hann fór út í atvinnumennsku.

Árið 2019 þjálfaði Arnar síðan KSV Roeselare í næstefstu deild í Belgíu en hann var síðan látinn taka pokann sinn í nóvember.

Önnur nöfn sem gætu komið til greina eru til að mynda Ejub Purisevic, sem þjálfaði Víking Ólafsvík nær samfleytt frá árinu 2003, kom þeim upp úr 3. deild í þá efstu og festi liðið rækilega í sessi í 1. deild. 

Þorvaldur Örlygsson, sem var valinn leikmaður ársins hjá KA þegar liðið vann sinn eina Íslandsmeistaratitil árið 1989. Þorvaldur spilaði síðan sem atvinnumaður í ensku úrvalsdeildinni með Nottingham Forest, auk þess að spila með Stoke og Oldham á Englandi. Hann var þjálfari KA árin 2000-2005 og þar af spilandi þjálfari árin 2000-2003. Auk þess þjálfaði hann m.a. Fram og náði hann að koma liðinu aftur í Evrópukeppni eftir langa fjarveru og festa liðið í sessi í efri hluta töflunnar.

Að lokum er sá möguleiki fyrir hendi að Hallgrímur Jónasson taki við liðinu en hann er leikmaður, fyrirliði og aðstoðarþjálfari KA en mun ekki spila á tímabilinu vegna meiðsla. Hann var í atvinnumennsku í tíu ár og á 16 A-landsliðsleiki fyrir Ísland. Það er spurning hvort hann fái tækifæri í ár sem aðalþjálfari liðsins þar sem hann mun ekki vera inn á vellinum í sumar.