Að hætta að vinna eftir vinnu

Þið kannist mörg við þetta. Eruð komin heim, búin að sækja börnin, það styttist í kvöldmat, þið rétt náðuð út í búð og þrátt fyrir öll þessi verkefni er hugurinn enn við vinnuna og verkefnin sem þar bíða.

Suma daga byrjar þú jafnvel á því að fara beint í vinnupóstinn um leið og þú ert kominn heim.

En er þetta málið?

Það er ekki að ástæðulausu sem talað er um jafnvægi einkalífs og vinnu eða hvíld á milli vinnudaga. Þetta er engin klisja og ef þú vilt vera framúrskarandi góður starfsmaður þá er eitt af því sem þú þarft að gera, er að hvíla þig eftir vinnu og hætta að vinna eftir vinnu. Hér eru nokkur ráð.

1. Losaðu þig við stressið

Þetta hljómar einfalt en er það ekki því þótt þú hættir að hugsa um vinnuna þegar heim er komið, getur streitan í kringum börn og heimilisrekstur líka verið þó nokkur. Fyrir hvíldina þína, þarftu samt að ná að losa þig aðeins undan stressinu.

Einföld ráð til þess gætu til dæmis verið að fara alltaf í þægileg föt, hlusta á tónlist, skrifa í dagbók, vafra fréttamiðla eða samfélagsmiðla, lesa í smá stund, eitthvað annað sjálfsdekur? Mögulega þarftu að leggja höfuðið aðeins í bleyti og finna út hvað hentar þér og þínum heimilisaðstæðum best en reyndu að finna eitthvað sem þú gerir helst fljótlega eftir að þú kemur heim og þú getur flokkað undir „streitulaust heimasvæði.“

Stundum virkar það líka vel að gleyma öllu stressi með því að bregða aðeins á leik með börnunum!

2. Vinnan skilin eftir í vinnunni

Að skilja vinnuna eftir í vinnunni hljómar mjög einfalt en fyrir marga er þetta hægara sagt en gert. Allt snýst þetta samt um að þú hreinlega þarft að taka ákvörðun: Vinnan er skilin eftir í vinnunni! Það er ekki nóg að ætla sér þetta svona nokkurn veginn eða bara stundum. Þetta á að vera markmið sem þú einsetur þér að eigi alltaf við, nema í algjörum neyðartilvikum.

3. Þín innri ró

Margir mæla með hugleiðslu til að ná innri ró, eða þjálfun í einhvers konar núvitund. Hugleiðsla er án efa mjög góð tækni en ef þér finnst hún ekki höfða til þín þarftu að velta því fyrir þér hvað annað gæti nýst þér vel til að ná innri ró eftir að heim er komið.

Eitt einfalt ráð sem nýtist mörgum er að taka sér mínútu eða svo í að horfa á einhvern hlut í umhverfinu heima fyrir og fókusera alveg á hann. Þetta gæti verið lampi, mynd á vegg, stóll eða eitthvað annað. Prófaðu að setjast niður og fókusera á eitthvað eitt í umhverfinu þínu og finndu út hvað hentar þér best: Að horfa á sama hlutinn daglega eða setja sér markmið um að fókusera á mismunandi hlut daglega.

4. Heimiliskyldurnar kláraðar

Við erum oft í heilmikilli vinnu heima fyrir eftir að vinnudegi lýkur. Börnin, uppvaskið, eldamennskan, setja í þvottavél. Pfúff, ekki endilega allt það skemmtilegasta! Eitt af því sem hjálpar okkur þó að njóta tímans eftir vinnu er að ganga rösklega til verks, klára allt sem þarf að klára og hjálpa okkur sjálfum þannig til að eiga meiri hvíldartíma.

Það er síðan undir þér komið að njóta hvíldartímans.