Segja tilkynninguna ekki tengjast þætti Kveiks

Kaupsamningur vegna hlutabréfa Samherja, sem eigendur félagsins framseldu til barna sinna, var undirritaður í ágúst í fyrra. Kaupin gátu hins vegar ekki gengið í gegn fyrr en ákveðnum fyrirvörum hafði verið aflétt og var það í nóvember. Þá býr Baldvin Þorsteinsson, sonur Þorsteins Más, forstjóra, í Hollandi og er þess vegna talinn vera erlendur aðili í skilningi laga. Þetta kemur fram í yfirlýsingu frá Samherja.

Tilefni yfirlýsingarinnar er fréttaflutningur um að atvinnuvegaráðuneytinu hefi ekki verið tilkynnt um kaupin fyrr en í nóvember. Nokkrum dögum áður en Kveikur sýndi rannsókn sína á umdeildum umsvifum Samherja í Namibíu, sem meðal annars varð til þess að Þorsteinn Már steig tímabundið til hliðar sem forstjóri Samherja.

Kjarninn sagði frá tilkynningunni og aðrir miðlar einnig. Í yfirlýsingu Samherja er Kjarninn og Ríkisútvarpið teknir fyrir sérstaklega.

„Var framsetning beggja miðla með þeim hætti að tilgangurinn var augljóslega sá að gera breytingar á eignarhaldi Samherja hf. tortryggilegar með því að gefa í skyn að þær tengdust fjölmiðlaumfjöllun um starfsemina í Namibíu,“ segir í yfirlýsingunni.

Þar segir ennfremur að forsvarsmenn Samherja hafi komist að því hvað þáttur Kveiks fjallaði um þann 25. október. Vinna við breytingar á eignarhaldi Samherja hafi staðið yfir í tvö ár. Því sé ljóst að tilkynningin til ráðuneytisins tengist þættinum ekki neitt.