Íslenskir rapparar prýða snakkpoka

Ungir frumkvöðlar hafa ráðist í framleiðslu á svokölluðu Rappsnakki en umbúðir þess skarta tveimur íslenskum röppurum. Snakkið er aðeins fáanlegt í gegnum Instagram, sem kom þó ekki í veg fyrir að fyrsta sendingin seldist upp. Von er á fleiri bragðtegundum og um leið fleiri röppurum á snakkpokum.

Rappsnakkið er með sýrðurjómabragði og er keilulaga, ekki ósvipað hinu gamalkunna Bugles-snakki. Iðnmark hefur veg og vanda af framleiðslunni en innblástur er sóttur að utan, ekki síst til Rap Snacks sem skartar rappstjörnum á borð við Cardi B og Migos.

Tveir talsmenn Rappsnakksins segja í samtali við útvarpsþáttinn Tala saman að hugmyndin hafi kviknað í frumkvöðlaáfanga í FG. Eftir að áfanganum sleppti hafi þeir ákveðið að halda áfram að vinna að vörunni. Afraksturinn leit svo formlega dagsins ljós í vikunni þegar fyrstu pokarnir af Rappsnakki fóru í dreifingu.

Aðspurðir um það hvers vegna sýrðarjómabragðið hafi orðið fyrir valinu segja talsmennirnir að fyrirsæturnar á pokunum, rappararnir Yung Nico Drippin og 24/7, hafi einfaldlega þótt það best. Þeir hafi smakkað nokkrar útgáfur og þótt þessi standa upp úr. Fleiri bragðtegundir séu þó á leiðinni og fleiri rappfyrirsætur sömuleiðis.

Þeir segja töluvert vesen að framleiða snakk, svo ekki sé minnst á kostnaðinn sem aðstandendur Rappsnakksins segjast hafa greitt úr eigin vasa. Sem stendur sé rappsnakkið aðeins fáanlegt á Instagram og er hægt að senda pantanir á @rappsnakk.

Spjall Tala saman við fulltrúa Rappsnakksins má heyra hér að neðan.