Telja að þau muni komast í gegnum ástandið

Ferðaþjónustufyrirtæki á Norðurlandi telja að þau muni komast í gegnum það ástand sem Covid-19 veirufaraldurinn hefur skapað og ætla að vera með opið hjá sér í sumar.

Þetta kemur fram í niðurstöðum könnunar sem Markaðsstofa Norðurlands gerði í byrjun maí. Meirihluti þeirra er að nýta úrræði ríkisstjórnarinnar, þar af eru flest þeirra að nýta hlutabótaleiðina.

Alls sögðu tæplega 39 prósent að mjög líklega myndi fyrirtækið þeirra lifa Covid-19 ástandið af og tæp 38 prósent segja það frekar líklegt. Þá var spurt um hvort fyrirtæki yrðu með opið hjá sér í sumar og segir í tilkynningu frá Markaðsstofunni að ánægjulegt sé að 91 prósent þeirra sem svöruðu þessari spurningu svöruðu henni játandi. Þar af voru 60 prósent sem verða með opið hjá sér allt árið og opnunin því ekki aðeins bundin við háönnina á komandi mánuðum.

Þegar spurt hvar um hvort fólk væri sammála þeirri fullyrðingu að íslenskir ferðamenn væru mikilvægir fyrir þeirra fyrirtæki, kom í ljós að meirihlutinn telur svo vera. Alls sögðu tæp 36 prósent að þau væru mjög sammála þessari fullyrðingu og tæp 23 prósent að þau væru frekar sammála.

Niðurstöður könnunarinnar má lesa hér.